Aqmola oblysyndaǵy Kýpchanovka aýylyna qazaqsha ataý berilmek

ASTANA. QazAqparat – Aqmola oblysynyń Bulandy aýdanyna qarasty Kýpchanovka aýylynyń ataýy Baıtas bolyp ózgerýi múmkin. Bul týraly «Ashyq» NQA portalynda jarııalanǵan Aqmola oblysy ákimdigi men maslıhatynyń birlesken sheshiminde jazylǵan, dep habarlaıdy QazAqparat tilshisi.

«Ideologııalyq turǵydan eskirgen ataýlary bar eldi mekender men olardyń quramdas bólikterin qaıta ataý jónindegi 2022-2025 jyldarǵa arnalǵan Jol kartasyn oryndaý maqsatynda Aqmola oblysy Bulandy aýdanynyń Qaraozeq aýyldyq okrýgine qarasty Kýpchanovka aýyly Baıtas bolyp ózgertilsin», - delingen sheshimde.

Qujatqa qosymsha berilgen túsindirmede jazylǵandaı, eldi meken ataýyn ózgertý úshin jergilikti bıýdjetten qarjy talap etilmeıdi.

Qujat 29 naýryzǵa deıin kópshilik talqylaýda bolady.

Eske sala ketsek, buǵan deıin Aqmola oblysynyń Birlik aýyldyq okrýgine qarasty úsh eldi mekenniń ataýy ózgeretinin habarlap edik. Jalpy, byltyr bul óńirde 11 aýyl men 90 kóshege qazaqsha ataý berildi.