Aqmola oblysyndaǵy kolonııalarda emdeý sharttary buzylǵan

KÓKShETAÝ. QazAqparat - Aqmola oblysyndaǵy kolonııalarda sottalǵandardy emdeýde kemshilikterge jol berilgen. Bul týraly Aqmola oblysy prokýratýrasynda ótken bas bostandyǵynan aıyrý oryndaryndaǵy medıtsınalyq qyzmettiń sapasyna qatysty alqaly jıynda aıtyldy, dep habarlaıdy QazAqparat tilshisi vedomstvonyń baspasóz qyzmetine silteme jasap.

Jıynǵa oblys ákiminiń orynbasarlary, qylmystyq-atqarý júıesi departamentiniń, densaýlyq saqtaý basqarmasynyń jáne oblystyń basqa da ýákiletti organdarynyń basshylary men jaýapty qyzmetkerleri qatysty. Onda prokýratýra júrgizgen tekseristermen sottalǵandarǵa medıtsınalyq qyzmet kórsetý salasynda birqatar kemshilikterdiń anyqtalǵany atalyp ótti. Bul dári-dármek formýlıaryn ýaqtyly bekitpeý, medıtsınalyq preparattardy tutyný esebin, dıagnostıka jáne emdeý hattamalaryn buzý, medıtsınalyq jabdyqtyń beker turýy jáne basqalar.

«Máselen, Zavodskoı kentiniń ETs-166/18 jáne Stepnogor qalasynyń ETs-166/11 mekemelerinde sottalǵandarǵa emdeý taǵaıyndaý kezinde dárilik preparattardy qabyldaý eseligi jáne uzaqtyǵy buzylǵan, al Arshaly kentiniń ETs-166/5 mekemesinde jekelegen naýqastar statsıonarda tıisti emdeý merziminen artyq bolǵan.

Kórsetilgen zańbuzýshylyqtarǵa mekemelerdiń basshylyǵy tarapynan jumysty tıisinshe uıymdastyrý jáne vedomstvolyq baqylaýdyń joqtyǵynyń saldarynan jol berilgen», dep atalyp ótti penıtentsıarlyq júıe mekemelerinde kórsetiletin medıtsınalyq qyzmettiń sapasy talqylanǵan alqa otyrysynda.

Alqa otyrysynyń qorytyndysy boıynsha birqatar naqty usynystar ázirlendi. Sonyń ishinde shtatty medıtsınalyq qyzmetkerlermen jabdyqtaý, olardyń biliktiligin arttyrý, dári-dármekti qoldanýǵa jáne qajettiligine taldaý júrgizý, olardy satyp alýdy qamtamasyz etý, kontıngenttiń arasynda jyl saıynǵy profılaktıkalyq tekserýler men skrınıngterdi uıymdastyrý, aýyr naýqas sottalǵandardy ákelýge jol sııaqty usynystar bar.

Oǵan qosa, ýákiletti organdardyń mekenjaıyna qadaǵalaý aktileri engizildi, olar qaralýda.