Aqmola oblysyndaǵy kólik oqıǵasy: Prokýror qyzmetinen bosatyldy
KÓKShETAÝ. QazAqparat - Aqmola oblysynda adam ólimine ákelip soqtyrǵan jol kólik oqıǵasyna qatysy bar kúdiktini qamaýdan bosatý týraly qaýly shyǵarǵan prokýror qyzmetinen bosatyldy, dep habarlaıdy QazAqparat tilshisi.
Eske sala keteıik, aǵymdaǵy jyldyń 8 sáýirinde Atbasar qalasynda Toyota Land Cruiser kóliginiń 31 jastaǵy júrgizýshisi joldyń shetinde ketip bara jatqan eki júrginshini qaǵyp ketti. Oqıǵa ornynan qashyp ketken júrgizýshi bir táýliktiń ishinde qolǵa túsken edi.
Alaıda, sol kezde Atbasar aýdany prokýrorynyń qaýlysymen kúdikti ýaqytsha ustaý ızolatorynan bosatyldy. Budan keıin Atbasar aýdandyq sotynyń úkimimen kúdikti eki aıǵa ýaqytsha ustaý oqshaýlaǵyshyna toǵytyldy. Keıin qorǵaýshylar men zardap shekken taraptyń aryzy boıynsha Aqmola oblystyq soty Atbasar aýdandyq sotynyń qaýlysyn ózgertip, kúdiktini 2 aı boıy úıqamaqta ustaý týraly sharasyn taǵaıyndady.
Osy oqıǵaǵa baılanysty, ıaǵnı, adam ólimine sebepker júrgizýshini qamaýdan bosatýǵa qaýly shyǵarǵan Atbasar aýdany prokýroryna qatysty QR Bas prokýratýrasy qyzmettik tekseris júrgizip, onyń qyzmetinen bosatýdyń sebebin aıtqan bolatyn.
«Qyzmettik tergeý nátıjesi boıynsha aýdan prokýrory qyzmetinen bosatyldy, Ol adam ólimine ákelip soqtyrǵan jol kólik oqıǵasyna qatysty qylmystyq isti tergeýdi tıisti deńgeıde qadaǵalamaǵan», - dep túsindirdi Aqmola oblysynyń prokýratýrasy QR Bas prokýratýrasynyń tekseris qorytyndysyna qatysty.
