Aqmola oblysyndaǵy Kóbeıtuzǵa barýǵa tyıym salynady

NUR-SULTAN. QazAqparat – Ereımentaý aýdanynyń ákimi men mobıldi baqylaý toby demalys kúnderi adamdar kóp shoǵyrlanǵan «Kóbeıtuz», «Teńiz» kóline reıd uıymdastyrdy, dep habarlaıdy QazAqparat tilshisi atalmysh aýdan ákimdiginiń Facebook paraqshasyna silteme jasap.

Ereımentaý ákimi Abaı Áljanov kólde demalýshylarmen aýdanda koronavırýs aýrýynyń keń taralýyna baılanysty qaýipsizdik sharalary týraly túsinikteme júrgizdi.

Jalpy 2020 jyldyń 13 shildesindegi Ereımentaý aýdany ákimi Abaı Áljanov ótkizgen jedel shtab otyrysynyń hattamasynda atalmysh kólderge qatysty naqty ereje jazylǵan.

«Ereımentaý aýdanynyń turǵyndary arasynda COVID-19 aýrýynyń ósýine baılanysty jáne Aqmola oblysy boıynsha Bas memlekettik sanıtarlyq dárigerdiń 04.07.2020 jylǵy № 86 buıryǵyna sáıkes, «Aýmaqta koronavırýstyq ınfektsııanyń aldyn alý boıynsha karantındik sharalardy kúsheıtý týraly», Ereımentaý aýdanynyń aýmaǵynda epıdemıologııalyq jaǵdaı turaqtalǵanǵa deıin - Ereımentaý aýdany shekarasy aýmaǵynda ornalasqan «Kóbeıtuz», «Kurbet», «Teńiz», «Qorjynkól» jáne basqa da kólderge barýǵa tyıym salynady», - delingen hattamada.

Áıtse de áleýmettik jelide taraǵan fotosýretter men vıdeolar bul hattama talaptary saqtalmaı otyrǵanyn aıǵaqtaıdy.