Aqmola oblysyndaǵy kenishke jasalǵan shabýylda bir kúzetshi mert boldy
KÓKShETAÝ. QazAqparat - «Qazaqaltyn TMK» AQ «Jolymbet» kenishine jasalǵan shabýyl saldarynan kúzetshi mert boldy, dep habarlaıdy QazAqparat «Qazaqaltyn» taý-metallýrgııalyq keshenine silteme jasap.
Mekemeniń habarlaýynsha, 2018 jyldyń 27 shildesinde shamamen tańǵy saǵat tórtte 20-25 belgisiz adamdar altynnan jasalǵan materıaldardy jymqyrý úshin «Azııa Qorǵaý» JShS qorǵaýyndaǵy «Qazaqaltyn TMK» AQ aýmaǵyna kirgen.
«Medıtsınalyq kýálandyrý kórsetkendeı, barlyq shabýyldaýshylar mas bolǵan. Aýmaqqa kirgen qaskóıler tobyn kúzet uıymynyń qyzmetkerleri baıqap, kedergi keltirýge tyrysqan. Alaıda, shabýyldaýshylar kúzetshini atys qarýymen bopsalap, soqqyǵa jyqqan», - delingen resmı habarlamada.
«Qazaqaltyn TMK» AQ korporatıvtik qaýipsizdik departamentinen qosymsha kúsh kelgende de belgisiz tulǵalar avtokólikterge tas atyp, qarýmen ses kórsetken.
Vedomstvonyń habarlaýynsha, qaskóılerdiń bir toby avtokólikterge shabýyldaǵan jáne ekinshi toby kúzetshiler men korporatıvtik qaýipsizdik departamentiniń jataqhanasyna basa-kóktep kirgen. Shabýylshylar ondaǵy kúzetshilerdi túrli deńgeıde jaraqattaǵan jáne qarýmen bopsalaǵan. Nátıjesinde 12 shabýylshy ustalyp, tergeý sharalaryn júrgizý úshin Jolymbet kentiniń ishki ister bólimshesine jetkizildi.
«Óz tarapynan, «Qazaqaltyn TMK» AQ «Azııa Qorǵaý» JShS jáne korporatıvtik qaýipsizdik departamentiniń zardap shekken qyzmetkerlerine qajetti kómek kórsetip jatyr jáne shabýylǵa qatysy bar tulǵalardy izdeý boıynsha qosymsha táýelsiz tergeý júrgizý bastamasyn kóterdi. Sonymen birge, óziniń qyzmettik mindetin atqarýda «Azııa Qorǵaý» qyzmetkeriniń qaza tapqanyn ókinishpen habarlaımyz. «Qazaqaltyn TMK» AQ atynan mert bolǵan kúzetshiniń týystary men jaqyndaryna kóńil aıtamyz», - dep pikir bildirdi «Qazaqaltyn» basshylyǵy.
Qazirgi ýaqytta «Qazaqaltyn TMK» AQ jáne «Azııa Qorǵaý» JShS moraldyq jáne materıaldyq shyǵyn kólemin anyqtaý boıynsha saraptamalar júrgizýde.
