Aqmola oblysyndaǵy qatty jelden sýsyz qalǵan aýylǵa aýyzsý berildi

KÓKShETAÝ. QazAqparat – Qatty jelden sý jınaý munarasy qulap qalǵan Birjan sal aýdanynyń Makınka aýylyna sý berile bastady, dep habarlaıdy QazAqparat tilshisi.

Aqmola oblystyq TJD baspasóz qyzmetiniń málimetinshe, Birjan sal aýdandyq kommýnaldyq kásipornynyń kúshimen sý qubyryna tikeleı jer asty sý sorǵysyn qosý múmkin bolǵan. Osy arqyly aýylǵa aýyzsý beriledi bastady.

«Jergilikti kommýnaldyq kásiporyn jumysshylarynyń shıraq qımylynyń arqasynda qysqa ýaqyttyń ishinde sý qubyryna tikeleı jer asty sý sorǵysyn qosý múmkin boldy. Qazirgi kezde aýylǵa sý berý jumystary qalpyna keltirildi», - dedi vedomstvodan.

Eske sala ketsek, osydan birer kún buryn Makınka aýylynda qatty jel sý jınaý munarasyn qulatqan edi. Sonyń saldarynan 1,7 myńǵa jýyq turǵyn aýyzsýsyz qaldy. Turǵyndarǵa tirshilik kózi tasymaldanyp jetkizildi.

Aıtalyq, osy kúni Makınka aýylynda turǵyndardyń jeke aýlalarynda 50-den astam uńǵyma, 50-den astam qudyq jáne ortaq paıdalanýdaǵy eki qudyq bar.