Aqmola oblysyndaǵy kásiporyn jylyna 500 myń aıaq kıim shyǵarady
Aıaq-kıim óndirisinde on jyldan astam ýaqyt jumys istep kele jatqan kásiporyn osy az ýaqyttyń ishinde otandyq naryqta óziniń ornyn taýyp, shetel naryǵyn baǵyndyrýda. Kásiporyn Reseı, Belarýs, Túrkııa, AQSh, Anglııa jáne Shyǵys Eýropa elderiniń jetekshi fabrıkalarynyń tehnologııasy boıynsha arnaıy maqsattaǵy aıaq kıimderdi shyǵarady. «SAMHAT» JShS bas dırektory Samal Tileýbaevanyń aıtýynsha, karantın sharalary kásiporyn jumysyna, ásirese, shıkizat jetkizý jáne daıyn ónimdi tasymaldaýda biraz kedergi keltirgenimen, qazirgi kezde óndiris qaıta jandanyp, ónimge suranys artqan.
«Aıaq kıim tigý – kúrdeli jumys. Tutynýshylardyń kádesine jaratý bar da, básekelestikke tótep berý bar ǵoı. Sondyqtan, biz ónimderimizdiń minsiz bolýyn qalaımyz. Bul bizdiń basty ustanymyz. Óıtkeni, ónimniń negizgi artyqshylyǵy sapasynda. Sondyqtan, biz ónimniń sapaly bolýy úshin sheteldiń jetekshi fabrıkalarynyń tehnologııasy boıynsha jumys isteımiz. Ónim barlyq talaptarǵa jáne QR memlekttik standartyna saı keledi», - deıdi Samal Tileýbaeva.
Kásiporyn basshysy atap ótkendeı, fabrıkanyń qýaty jylyna 500 myń jup aıaq kıim shyǵarýǵa jetedi. Sol kezde 150 adamdy jumyspen qamtý múmkindigine ıe bolady eken. Ázirge keıbir mamandardyń joqtyǵy qolbaılaý bolyp otyrǵan kórinedi. Máselen, tehnolog, mehanık, tiginshi tárizdi birneshe mamandyq boıynsha mamandar qajet. Jumys istep júrgen adamdardyń kásibı sheberlikterin jetildirý óz aldyna bir másele. Fabrıka búgingi tańda erler jáne áıelder aıaq kıimi, áskerı-kúshtik qurylymdarǵa, jumysshylarǵa arnalǵan aıaq kıimder shyǵarady.
Aıta keteıik, «SAMHAT» JShS aıaq-kıim fabrıkasyn ashý úshin 300 mıllıon teńge qarjy jumsaǵan. Kásiporyn bastapqyda Nur-Sultan qalasynda ǵımarat jaldap kelgen bolatyn. Keıin 2014 jyly Tselınograd aýdanynyń Maksımovka aýlynda bos turǵan ǵımaratty jóndep, qaıta qalpyna keltirdi. Kásiporyn basshylyǵy keleshekte óndiris aıasyn keńeıtip, turǵyndar kúndelikti kıetin aıaq kıimniń birneshe túrin shyǵarý maqsat tutyp otyr. Búgingi kúni «SAMHAT» JShS aıaq-kıim fabrıkasy Aqmola oblysynyń ǵana emes, elimizdiń jeńil ónerkásip salasynda sátti jumys istep kele jatqan kásiporyndardyń birinen sanalady.
Aqmola oblystyq kásipkerlik jáne ónerkásip basqarmasynyń málimetinshe, óńirde bıylǵy jyldyń qańtar-cáýir aılarynda jeńil ónerkásip kásiporyndary 2 043,0 mıllıon teńgeniń ónimin óndirgen. Bul kórsetkish byltyrǵy jylmen salystyrǵanda 145,4 paıyzdy qurap otyr. Naqtyraq aıtsaq, onyń ishinde toqyma buıymdaryn óndirý kólemi 1,5 mıllıard teńge, kıim óndirý kólemi 172,3 mıllıon teńge, bylǵary jáne oǵan jatatyn ónimder óndirý kólemi 297,5 mıllıon teńgeni quraıdy. Óńdeý ónerkásibi qurylymynda jeńil ónerkásiptiń úlesi 0,7 paıyzdy qurady.
