Aqmola oblysyndaǵy gıdrotehnıkalyq qurylystardyń 70 paıyzy tozǵan
Aqmola oblystyq TJD Tótenshe jaǵdaılardy aldyn alý basqarmasynyń bastyǵy, azamattyq qorǵaý polkovnıgi Erden Berlibekovtiń málimetinshe, óńirdegi 90 gıdrotehnıkalyq qurylys bolsa, onyń 17 respýblıkalyq, 66 kommýnaldyq jáne 7 jeke menshiktegi. Ótken jyly bul gıdrotehnıkalyq qurylystardyń tehnıkalyq jaı-kúıin anyqtaý úshin komıssııalyq vızýaldy tekserýler júrgizildi. Sonyń qorytyndysy boıynsha óńirdegi gıdrotehnıkalyq qurylystarynyń jartysynan astamy apatty jaǵdaıda jáne jóndeýdi qajet ekeni anyqtaldy.
«Búgingi tańda barlyq gıdrotehnıkalyq qurylystardyń paıdalaný merzimi 30 jyldan asady, onyń 70 paıyzynyń tozyǵy jetken. Ivankovskaıa bógeti tolyǵymen derlik bosatyldy (jobalyq kólemi 15 mln.tekshe metr, naqty kólemi 0,1 mln. tekshe metr), sonymen qatar kóktemgi kezeńde sý qoımasy tolǵan jaǵdaıda iske qosylýy tıis sý burý arnasy jabdyqtaldy», - deıdi Erden Berlibekov.
Osnovnaıa bóget boıynsha jergilikti (aýdandyq, oblystyq) bıýdjetten 40 mıllıon teńge bólindi, merdiger retinde «Shortandy sý» kommýnaldyq kásiporny anyqtaldy. 2022 jyldyń 15 qazany men 10 jeltoqsany aralyǵynda «RD Group KZ» JShS qurylys uıymy jumystardy júrgizý smetasyna sáıkes bógettiń osal tustaryn nyǵaıtty, sý qabyldaý kameralaryn betondaý jáne sý aǵyzý qubyrlaryn nyǵaıtý úshin monolıtti tireý qabyrǵasyn ornatty.
«Vedenovskaıa bógeti boıynsha sý tasqyny kezinde artyq aǵyn sýlardy aǵyzý úshin sý burý arnasy jabdyqtaldy. Al qanaǵattanarlyqsyz jaǵdaıdaǵy qalǵan gıdrotehnıkalyq qurylystar bosatylady nemese tranzıttik rejımge aýystyrylady», - dep tolyqtyrdy Erden Berlibekov.
Osy rette, Astana, Seletti jáne Shaǵalaly sý qoımalarynyń rejımin retteýge jáne olardy qysqy kezeńde paıdalanýǵa erekshe nazar aýdarylyp otyr.
«Óńirdegi barlyq gıdrotehnıkalyq qurylystar baqylaýǵa alynǵan. Qaýipti ýchaskelerde baqylaý beketteri ornatylady. Kóktemgi sý tasqynyna daıyndyq boıynsha josparly jumystar jalǵasýda. Tasqyn sýlardy apatsyz ótkizý boıynsha barlyq qajetti sharalar qabyldanýda», - dep túıindedi Erden Berlibekov.
Aıta ketsek, Kókshetaý ýnıversıtetinde 100-den astam adam evakýatsııalandy.
