Aqmola oblysyndaǵy eshki fermasy bıyl alǵashqy ónimin saýdaǵa shyǵarmaq
KÓKShETAÝ. QazAqparat - Aqmola oblysynyń Tselınograd aýdanynda 5000 eshkige arnalǵan sútti taýarly ferma bıylǵy jyly alǵashqy ónimin saýdaǵa shyǵarmaq. Bul týraly búgin oblys ákimi Sergeı Kýlagınniń atalǵan óńirge jumys sapary barysynda aıtyldy, dep habarlaıdy «QazAqparat» HAA tilshisi.
Qajymuqan aýylynda qolǵa alynǵan eshki sútin óndiretin kásiporyn ótken jyly iske qosylǵan bolatyn. Tyń jobany «Zerenda» asyl tuqymdy sharýashylyq» JShS-niń dırektory Hamıt Faezov pen quryltaıshysy Ermek Luqpanov júzege asyryp otyr.
Hamıt Faezovtyń aıtýynsha, barlyǵy osydan úsh-tórt jyl buryn bastalǵan bolatyn. Sol kezde ol óziniń áriptesi Ermek Luqpanovpen aqyldasa kele, Astananyń irgesinde eshki sútin óndirýdi qolǵa alýdy sheshedi. Aldaryna naqty mindet qoıǵan olar aldymen atalǵan óndiristiń paıdasy men zııany jóninde zerttep biledi. Tipti osy maqsatta Eýropaǵa Izraılge baryp, sol jaqtaǵy sharýalardyń tájirıbesin de kózben kórgen.
«Qazirgi kezde, is ilgeri jyljyp, negizgi sút tsehy, 72 eshkige arnalǵan saýyn alańy jáne jyldyq qýaty 4 myń tonna sút zaýyty salynǵan. 344 bas eshkimiz bar. Aldaǵy ýaqytta kəsiporyn tolyq qýatyna shyqqan kezde tól basyn 5000-ǵa deıin jetkizý josparlanǵan. Bul asyl tuqymdy eshkilerden jylyna 800 jáne 1200 lıtrge deıin sút alýǵa bolady. Odan sút, irimshik jəne ıogýrt tərizdi 12 túrli sút ónimin shyǵaratyn bolamyz. Alynǵan ónimdi osynda óńdep, shetelge eksportqa shyǵarý josparda bar. Qazirdiń ózinde Italııa jáne Qytaı elderi bolashaqta bizden shyǵarylatyn sútke qyzyǵýshylyq tanytyp otyr», - deıdi Hamıt Faezov.
