Aqmola oblysyndaǵy eldi mekenderden 1 mln tekshe metr qar shyǵaryldy
KÓKShETAÝ. QazAqparat - Aqmola oblysynda kótkemgi sý tasqynyna daıyndyq sharalary qyzý júrgizilýde. Búgingi kúnge deıin óńirdegi eldi mekenderden barlyǵy 1 mıllıon 103,4 myń tekshe metr qar shyǵaryldy, dep habarlaıdy QazAqparat tilshisi.
Aqmola oblystyq TJD málimetinshe, óńirde sý tasqynyna daıyndyq sharasy ótken jyldyń jazynda bastalǵan. Eldi mekenderdi ınjenerlik qorǵaý josparyna sáıkes 54 eldi mekende aryqty tereńdetý, sý bógetin jóndeý, jańasyn turǵyzý, ózen arnasyn tazalaý jumysy júrgizildi.
«Oblystyń eldi mekenderinen 1 mıllıon 103,4 myń tekshe metr qar shyǵaryldy. Sý tasqynyna 1 921 adam, 979 arnaıy tehnıka, 122 motopompa, 48 júzý quraly daıyndaldy. QR ІІM bólimshelerinde 524 adam, 111 arnaıy tehnıka, 12 júzgish qural, 107 motopompa bar. Sondaı-aq, ár aýdandaǵy departament bólimsheleriniń 107 motosorǵysy sý tasqyny qaýpi mol aımaqqa jiberiledi. Budan bólek, oblys aýmaǵyndaǵy sý tasqyny kúsheıgen kezde Tótenshe jaǵdaı komıtetiniń ózge óńirlerdegi 814 adamdy, 161 tehnıkany, 31 júzý quraly men qarjysyn jaǵdaıǵa qaraı paıdalaný qarastyrylyp otyr», - deıdi Aqmola oblystyq TJD bastyǵynyń orynbasary Qanat Dospaev.
Aıta keteıik, TJD deregi boıynsha óńirde tótenshe jaǵdaıdy eskertý jáne joıýdyń oblystyq jáne óńirlik shtabtary qurylyp jumys isteýde. Tótenshe jaǵdaı rezervine 1 mıllıard 179 mıllıon teńge qarjy aýdarylǵan. Óńirlerde 225,6 tonna janar-jaǵar maı, 24 myń tonna ınert materıal, 84,4 myń qap ázirlendi.
Sondaı-aq, qaýipti aımaqtan kóshiriletin adamdardy qabyldaıtyn 192 pýnkt daıyndaldy. Ózenniń qaýipti ýchaskelerinde sýdyń deńgeıi men jaǵdaıyna monıtorıng júrgizý úshin qosymsha 97 baqylaý beketiniń kezekshiligi uıymdastyrylmaqshy.
