Aqmola oblysyndaǵy Bestóbe kentiniń turǵynynan 14 keli esirtki tárkilendi
Vedomstvonyń málimetinshe, er adam esirtki zatyn ózi qarasora tárizdi ósimdikten jasap satqan. Esirtki saýdalaýshy Bestóbe kentinde 13 sáýirde ustaldy.
«Esirtki qylmysymen kúres jónindegi basqarmanyń qyzmetkerleri er adamnyń óńirde esirtki saýdasyna qatysy baryn anyqtaý úshin birqatar aldyn alý sharasyn júrgizdi. Tintý kezinde onyń úıinen polıetılen jáne qaǵaz býmaǵa, 5 lıtrlik plastık ydysqa salynǵan 14 keli esirtki zaty tárkilendi. Budan bólek, marıhýana, 49 túp keptirilgen qarasora, jáne 2 gramm gashısh alyndy», - deıdi vedomstvodan.
Qazirgi kezde tártip saqshylary Bestóbe kentiniń jumyssyz júrgen turǵynynan osynshama mólsherde esirtki qaıdan alǵanyn anyqtap jatyr. Sonymen qatar, Aqmola óńirine jetkizý joldaryn anyqtaý qolǵa alynǵan.
«Bestóbe kentiniń 48 jastaǵy turǵyny oqshaýlaǵyshqa qamalyp, ústinen QR Qylmystyq kodeksiniń 297-baby boıynsha sotqa deıingi tergeý amaldary júrgizilýde», dep tolyqtyrdy vedomstvodan.