Aqmola oblysyndaǵy aýylǵa sý tasý qaýpi seıilgenshe dárigerler kómek kórsetedi
KÓKShETAÝ. QazAqparat - Aqmola oblysyndaǵy Kalýton ózeninde sýdyń deńgeıi túse bastady, dep habarlaıdy QazAqparat tilshisi aýmaqtyq Tótenshe jaǵdaılar departamentiniń baspasóz qyzmetine silteme jasap.
Vedomstvonyń málimeti boıynsha, ózen sýy qaıta bastaǵanymen aýylǵa áli kólik qatynaı almaı otyr. Sol sebepti Medıtsınalyq apat ortalyǵynyń dárigerleri aýyl turǵyndaryn tekserip, medıtsınalyq kómek kórsetýde.
Qutqarýshylar adamdardy qaıyqtyń kómegimen tasymaldap, ekinshi jaq bettegi jaǵaǵa shyǵaryp jatyr. Qajet bolsa aýrýhanaǵa jáne ózge eldi mekenderge de jetkizedi.
Belgili bolǵandaı, keshe ǵana Nur-Sultan qalasyndaǵy Medıtsınalyq apat ortalyǵy fılıalynyń dárigerleri aýyldaǵy dárigerlik ambýlatorııa feldsherimen birlesip, balasy naýqastanǵan anany aýrýhanaǵa jedel jetkizý boıynsha kómek kórsetti. Naýqas bala anasymen birge Astrahan aýdandyq aýrýhanasyna jetkizildi. Dárigerler balanyń aýrýhanada mamandardyń baqylaýynda bolǵany durys deıdi.
Aıta ketý kerek, sý basqan jertóleler men aýlalardaǵy sý qaıtty. Kolýton ózenindegi sýdyń deńgeıi túsip keledi. Turǵyn úıler men aýlalardy sý basý qaýipi joq. Tek aýylǵa qatynaıtyn avtomobıl joly ǵana jabyq.
«Sol sebepti, Medıtsınalyq apat ortalyǵynyń dárigerleri jol ashylyp, sý tasqynynyń qateri túbegeıli seıilgenshe Staryı Kolýton aýylynda bolyp, turǵyndarǵa medıtsınalyq kómek kórsete beredi», - deıdi vedomstvonyń baspasóz hatshysy.
