Aqmola oblysyndaǵy aýylda órt sóndirý beketi ashyldy
KÓKShETAÝ. QazAqparat – Aqmola oblysynda osymen 29-shy órt sóndirý beketi ashyldy, dep habarlaıdy QazAqparat tilshisi oblystyq Tótenshe jaǵdaılar departamentine (TJD) baspasóz qyzmetine silteme jasap.
«Bul joly órt sóndirý beketi Birjan sal aýdanynyń Birsýat aýylyndaǵy «Baımyrza Agro» JShS-nan ashyldy. Órt sóndirý beketi Birsýat, Mamaı jáne Zaýral aýyldyq okýrgteriniń jáne dalaly orman massıvteriniń órtke qarsy qorǵanysyn qamtamasyz etedi», - deıdi vedomstvo ókilderi.
TJD jańa bólimsheni órt sóndirý tehnıkasymen qamtamasyz etse, aýdan ákimdigi 5 mıllıon teńge qarjy bóldi. Bul qarjyǵa Ereımentaý aýdanyndaǵy «Qazaqstan Injınırıng avtojóndeý zaýyty» AQ bazasynda órt sóndirý avtokóligine kúrdeli jóndeý jumystary júrgizildi. Al «Baımyrza Agro» JShS-i óz qarajatyna ǵımarattyń shatyry, esigin jáne jylý júıesin jańartyp berdi.
«Órt sóndirý beketi jylytylatyn bokspen qamtamasyz etilgen, telefon baılanysy jumys isteıdi. Tórt qyzmetker jáne bir órt sóndirý avtokóligi bar. Jańadan qurylǵan komanda tek órtti sóndirip qana qoımaı, sonymen qatar olardyń jaýapkershilik aımaǵynda bolǵan basqa da tótenshe jaǵdaılardy joıýǵa qatysady, qıyn jaǵdaıǵa tap bolǵan adamdarǵa, halyqqa kómek kórsetedi», - dep tolyqtyrdy vedomstvodan.
