Aqmola oblysyndaǵy aýylda hokkeı korty ashyldy
KÓKShETAÝ. QazAqparat - Aqmola oblysynyń Arshaly aýdanyndaǵy aýyldarda QR Táýelsizdigi kúnine tartý retinde jańa hokkeı korty, naýbaıhana jáne dúken ashyldy, dep habarlaıdy QazAqparat tilshisi aýdan ákimdigine silteme jasap.
Halyq arasynda «jasyl» aýyl atanyp ketken Arnasaı aýyldyq okrýginde ashylǵan jańa sport nysanyn «Gýtıar» jáne «Agrorıtm» sharýa qojalyqtary birlesip salǵan. Ol úshin qojalyq basshylary 3,400 mıllıon teńge kóleminde demeýshilik qarjy jumsaǵan. Zamanaýı hokkeı kortynda sportshylardyń kıim aýystyratyn jyly orny da bar.
Al Volgodonovka aýyldyq okrýginde «Qoıgeldi Astyq» seriktestigi aıyna 10 myń nan pisiretin naýbaıhana men azyq-túlik dúkenin ashty. Naýbaıhanada nannyń 10 túri pisiriledi.
«Jańa nysannyń ashylý saltanatyna qatysqan aýdan ákimi Talǵat Muhanbedjanov halyqty joǵary sapaly nan ónimderimen qamtamasyz etý basty maqsat ekenin atap ótti. Sonymen qatar, el Táýelsizdiginiń 28 jyldyǵy qarsańynda paıdalanýǵa berilip otyrǵan nan zaýytynyń jumysyna sáttilik tiledi», - dedi aýdan ákimdiginen.
