Aqmola oblysyndaǵy aýyl brýtsellezge baılanysty karantınge jabyldy

ASTANA. QazAqparat – Aqmola oblysyndaǵy Novomarınovka aýylynda iri qaradan brýtsellez anyqtalyp, eldi mekenge shekteý engizildi, dep habarlaıdy QazAqparat tilshisi.

«Іri qara maldyń brýtsellez aýrýynyń anyqtalýyna baılanysty Atbasar aýdany Shuńqyrkól aýyldyq okrýginiń Novomarınovka aýyl aýmaǵynda shekteý is-sharalary belgilensin», - dep jazylǵan Ashyq NQA portalynda jarııalanǵan Shuńqyrkól aýyldyq okrýginiń ákimi Svetlana Valıtovanyń sheshim-jobasynda.

Shekteý sharalaryn engizý týraly sheshim búginnen, ıaǵnı 14 shildeden bastap kúshine endi.

Birneshe kún buryn Qaraǵandy oblysyna qarasty Mádı aýyldyq okrýginde 3 bas iri qaradan brýtsellez aýrýy anyqtalyp shekteý engizilgenin habarlaǵan bolatynbyz.

Qosa ketsek, bıyl Shyǵys Qazaqstan oblysynda 9 adam brýtsellez juqtyrdy.