Aqmola oblysyndaǵy alaman báıge: 8 jasar shabandoz birinshi oryn aldy

KÓKShETAÝ. QazAqparat – Aqmola oblysynyń Krasnoıar kentindegi «Qulager» atshabarynda Báıgeden Qazaqstan chempıonaty – Olimbet at jarysy ótti, dep habarlaıdy QazAqparat tilshisi.

Jıyrma bir shaqyrymdyq alaman báıgede Jetisý oblysynyń Jalǵyzaǵash aýylynan kelgen 8 jasar shabandoz Amangeldi Hamsa «Jumyr tuıaq» tulparymen márege birinshi keldi.

Bapkeri Marlan Bektenovtyń aıtýynsha, bul shabandoz Amangeldi Hamsa men 3 jasar «Jumyr tuıaq» tulparynyń alyp otyrǵan birinshi júldesi emes. Osyǵan deıin de talaı báıgede top jarǵan.

«Báıgeden Qazaqstan chempıonaty – Olimbet at jarysyna biz eki sáıgúlik ákeldik. Sonyń biri – 8 jasar balamyz Amangeldi Hamsa taqymdaǵan «Jumyr tuıaq» tulparymyz birinshi bolyp kelip, uıymdastyrýshylardyń atynan tigilgen 5 mıllon teńgeniń júldesin enshiledi. «Jumyr tuıaq» úsh jasta, ol – ataqty «Aı tuıaq» aıǵyrynyń balasy. Ótken jyly qunan jarysynda úsh kólik utyp alsaq, bıyl Semeı qalasynda soǵys ardageriniń júldesi sarapqa salynǵan báıgede top jardyq», - dep qýanyshymen bólisti Marlan Bektenov.

Bapker atap ótkendeı, aldaǵy ýaqytta QR Prezıdentiniń kýbogyna daıyndyq bastalmaq.

Aıta ketsek, budan buryn «Aqmola juldyzdary» oblystyq shyǵarmashylyq baıqaýynyń jeńimpazdary marapattalǵanyn jazǵan edik.