Aqmola oblysyndaǵy 125 eldi meken sý basý qaýipi bar aýmaqta ornalasqan
KÓKShETAÝ. QazAqparat - Aqmola oblysynda «Kóktem-2020» respýblıkalyq komandalyq-shtabtyń oqý-jattyǵýy ótip jatyr, dep habarlaıdy QazAqparat tilshisi.
Kóktemgi sý tasqyny zardabyn joıý kezindegi is-qımyldy jáne azamattyq qorǵanys júıesiniń daıyndyǵyn anyqtaý maqsatynda uıymdastyrylǵan sharaǵa Aqmola oblystyq TJD bastyǵy Alekseı Sovetov, jergilikti atqarýshy organdar, QR ІІM TJK óńirlik bólimsheleri jáne azamattyq qorǵanys qurylymdary tartyldy.
Sharada arnaıy-taktıkalyq jattyǵý jumystary barysynda kóktem aılarynda oryn alatyn sý tasqyny tárizdi tótenshe jaǵdaılardy joıý kezinde basqarma organdary men memlekettik azamattyq qorǵanys kúshteriniń daıyndyǵy tekserilip, algorıtmi pysyqtaldy. Bul bıylǵy «Kóktem-2020» respýblıkalyq komandalyq-shtabtyń oqý-jattyǵýynyń alǵashqysy.
«Oblysta Tselınogorad, Ereımentaý, Arshaly, Astrahan, Atbasar, Sandyqtaý aýdandary qaýipti óńirler sanalady. Bul aýdandarda qardyń mólsheri kópjyldyq normadan joǵary. Búgin Aqmola oblysy aýmaǵynda sý tasqynyn apatsyz ótkizýge daıyndyq jáne «Kóktem-2020» respýblıkalyq komandalyq-shtabtyń oqý-jattyǵýy sheńberinde Kókshetaý qalasynda oblystyq jáne qalalyq deńgeıdegi jedel áreket etý otrıadtarynyń jıyny uıymdastyryldy. Oblysta sý basý qaýipi bar aýmaqta ornalasqan 125 eldi-meken bar. Ótken jyly bıylǵy kóktemdegi sý tasqynynyń aldyn alý maqsatynda 54 eldi-mekende ınjenerlik qorǵanys sharalary qolǵa alyndy. 2 445 adam men 1090 arnaıy tehnıka, 229 motopomp, 60 júzý quraly ázirlendi, onyń ishinde QR ІІM Aqmola oblysyna ýaqytsha ornalastyrylatyn bólimsheleri bar. Budan bólek, TJK elimizdiń ózge óńirlerinen qosymsha qutqarýshylardy tartý máselesi qarastyrylyp otyr», - dedi Alekseı Sovetov.
