Aqmola oblysynda jylqy izdeýge shyqqan qarııa joǵalyp ketti
KÓKShETAÝ. QazAqparat - Aqmola oblysynyń Aqkól aýdanynda iz-túzsiz joǵalyp ketken 64 jastaǵy zeınetkerge izdeý jarııalandy, dep habarlaıdy QazAqparat tilshisi oblystyq ІІD baspasóz qyzmetine silteme jasap.
Polıtseılerdiń deregi boıynsha, Jalǵyzqaraǵaı aýylynyń týmasy 1954 jylǵy Aleksandr Dosýev mamyrdyń 27 kúni úıinen mototsıklmen jylqy izdeýge shyǵyp, qaıtyp oralmaǵan. Bul týraly onyń tanysy bir kún ótkennen keıin polıtsııaǵa habarlaǵan. Er adam jalǵyz turǵan.
Qazirgi kezde, Astana qalasy, Shortandy jáne Aqkól aýdandary aýmaǵynda izdestirý sharalary júzege asyrylýda.
Aıta keteıik, er adamnyń boıy 170-172 santımmetr, dene bitimi ortasha. Ústine keýdeshe, qara tústi djınsy shalbar, aıaǵyna qara tústi kebis kıgen.
Kórgen adamdar bolsa, Aqmola oblysynyń ІІD, Aqkól aýdandyq ІІB 8 (716 38) 2-10-02, 2-16-52, 8-771-700-79-11 telefon nómiri arqyly habarlasýyna bolady.
