Aqmola oblysynda jyl ishinde esirtkige masaıǵan 261 júrgizýshi ustalǵan
KÓKShETAÝ. QazAqparat - Aqmola oblysynda ótken jyly esirtkige masaıǵan 261 júrgizýshi ustalyp, jaýapqa tartyldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń deregi boıynsha, óńirdiń tərtip saqshylary esirtki bıznesine qarsy is-qımyl jəne aldyn alý sharalary boıynsha 2018 jyldyń jumys qorytyndysyn shyǵardy.
Búgingi tańda vedomstvo esirtki bıznesimen kúresti eki baǵytta júrgizýde. Onyń biri - esirtki jetkiziletin arnalardy anyqtap jabý bolsa, ekinshisi aldyn alý sharalaryn keń kólemde ótkizý.
«Ótken jyly polıtseıler zańsyz aınalymda júrgen 870 keli túrli esirtki zattaryn tərkiledi. Esirtki saýdalaýdyń 77 oqıǵasyn anyqtady. Sonymen qatar, baqylaýda turǵan esirtki zattarynyń qoldy bolyp ketpeýi jumystaryna nazar aýdaryldy. 2018 jyly esirtki jəne psıhotropty zattardyń aınalym erejesin buzǵan medıtsınalyq qyzmetkerlerge qatysty 3 qylmystyq is qozǵaldy, 26 əkimshilik materıaldar toltyryldy», dedi vedomstvo ókilderi.
Əsirese, tərtip saqshylaryn júrgizýshilerdiń esirtkige masań kúıde kólik basqarýy alańdatyp otyr. Ótken jyldyń qorytyndysy boıynsha oblys aýmaǵyndaǵy avto joldarda jol-patrýldik polıtsııa batalonynyń qyzmetkerleri esirtkige masaıǵan 261 júrgizýshini ustap, jaýapqa tartty.
«Qolǵa alynyp jatqan sharalar esirtki qoldanýshy adamdardyń sanyn azaıtýda aıtarlyqtaı nətıje berýde. Məselen, 2017 jyly esirtki qoldanýshylar tiziminde turǵandardyń sany 667 adam bolsa, ótken jyly 545 adamdy qurady», dep tolyqtyrdy vedomstvodan.
Buǵan deıin Kókshetaý polıtseılerine 20 jańa kólik syıǵa berilgendigin jazǵan bolatynbyz.
