Aqmola oblysynda jyl basynan beri tabıǵatty qorǵaý zańnamasy 187 ret buzylǵan
KÓKShETAÝ. QazAqparat - Aqmola oblysynda jyl basynan beri tabıǵatty qorǵaý zańnamasynyń 187 ret buzylǵany anyqtaldy, dep habarlaıdy QazAqparat tilshisi oblystyq PD baspasóz qyzmetine siletem jasap.
Vedomstvonyń málimetinshe, óńirde «Brakoner» jedel aldyn alý sharasynyń qorytyndysy shyǵaryldy. Bıylǵy jyldyń 6 qańtary men 5 aqpany aralyǵynda uıymdastyrylǵan aktsııa barysynda óńirdiń tabıǵatty qorǵaý polıtsııasynyń qyzmetkerleri kúsheıtilgen rejımde jumys istedi. Sharanyń maqsaty – brakonerliktiń jolyn kesý, bıologııalyq resýrstar nysandarynyń zańsyz aınalymy jáne qoldanystaǵy zańnamany buzýǵa qatysty ózge de zańbuzýshylyqtardy anyqtaý.
Osy rette aıta ketsek, Aqmola oblysy aýmaǵynda «Býrabaı», «Kókshetaý» sııaqty ulttyq eki saıabaq pen «Qorǵaljyn» qoryǵy bar.
«Brakoner» jedel aldyn alý sharasy barysynda jergilikti polıtsııa qyzmeti, ákimshilik, krımınaldy jáne kóshi-qon polıtsııasynyń qyzmetkerlerinen quralǵan 81 mobıldik top quryldy. Onyń 25-i jergilikti vedomstvolardyń ókilderimen birlesip qurylǵan.
«Tártip saqshylary bir aı ishinde 460-tan astam túrli reıdtik sharalardy qolǵa aldy. Sonyń nátıjesinde tabıǵatty qorǵaý zańnamasynyń 187 ret buzylǵany anyqtalyp, qylmystyq is qozǵaldy.
«Brakoner» jedel aldyn alý sharasy barysynda 91 ańshy QR ÁQbK 382-babynyń 1-bóligi boıynsha (ańshylyq erjesin buzý), 38 áýesqoı balyqshy QR ÁQbK 383-babynyń 1-bóligi boıynsha (balyq aýlaý erejesin buzý) ákimshilik jaýapkershilikke tartyldy.
Sondaı-aq, ańshylyq myltyqty saqtaý, ustaý jáne tasymaldaý tártibi buzylǵany anyqtaldy. Tártip saqshylary 12 qarý tárkiledi. Jalpy, ańshylar men balyqshylarǵa salynǵan ákimshilik aıyppuldyń kólemi 1 mıllıon teńgeni qurady», - dedi vedomstvodan.
PD baspasóz qyzmetinen atap ótkendeı, Aqmola oblysy aýmaǵynda zańsyz ań aýlaýdyń 5 deregi, zańsyz balyq aýlaýdyń 1 deregi anyqtaldy. Barlyq anyqtalǵan zań buzýshylyqtar boıynsha sotqa deıingi tergeý amaldary júrgizilýde.
