Aqmola oblysynda jyl basynan beri 91 bala kóz jumdy
KÓKShETAÝ. QazAqparat - Aqmola oblysynda bıylǵy jyldyń on aıynda 91 bala kóz jumdy. Bul týraly óńirlik densaýlyq saqtaý basqarmasynyń alqa otyrysynda oblystyq basqarma basshysy orynbasarynyń mindetin atqarýshy Elena Ivanova aıtty, dep habarlaıdy QazAqparat tilshisi.
E.Ivanovanyń aıtýynsha, eldegi strategııalyq kórsetkishterdiń biri ana men bala ólimin azaıtý. Máselen, Aqmola oblysynda bosandyrý boıynsha jeti ındıkatordyń tórteýi oryndalǵan joq. Mysaly, tómen ana ólimi kórsetkishine qol jetkizilgen joq. Nysanaly kórsetkish 28,2 paıyz bolsa, óńirde kórsetkish - 45,3 paıyz.
«Ana óliminiń eń joǵary kórsetkishteri- Kókshetaýdaǵy «Viamedis» JShS-147,2 (ıaǵnı eki ana ólimi), Stepnogordegi «Viamedis» JShS (bir ana ólimi), «Avıtsenna-Býrabaı» JShS, Tselınograd jáne Jarqaıyń aýdandarynda (bir-birden) tirkeldi. «Viamedis» JShS basshylyǵy qandaı da bir qatań sharalar qabyldaýy kerek»,- dedi E.Ivanova medıtsına qyzmetkerlerine.
Kelesi qol jetkizilmegen ındıkator – ekstragenıtaldyq aýrýlarmen aýyr júktiliktiń jıiligi, jasóspirimder arasyndaǵy júktiliktiń jıiligi, perınataldyq biriktirilgen genetıkalyq skrınıngpen qamtý paıyzy.
Jol kartasyn oryndaý boıynsha eń nashar kórsetkish: 85,7 paıyzy oryndalmaǵan, ıaǵnı alty kórsetkish – Bulandy aýdandyq aýrýhanasynda. Stepnogor qalasy, Esil, Jarqaıyń, Sandyqtaý jáne Tselınograd aýdandaryndaǵy «Viamedis» JShS-nde bes kórsetkish oryndalmaǵan.
«Oblysta 10 aıda 52 qıyn jaǵdaı boldy. Olardyń sebepteri medıtsınalyq kómek kórsetýdi uıymdastyrý tarapynan kemshilikter, bastapqy býyn deńgeıinde medıtsınalyq kómekti álsiz uıymdastyrý, statsıonar deńgeıinde jaǵdaıdy jete baǵalamaý, pandemııaǵa baılanysty medıtsınalyq kómekke qoljetimdiliktiń tómendeýi boldy. Sondaı - aq, óz densaýlyǵy úshin yntymaqty jaýapkershiliktiń tómen bolýy oryn alyp otyr», - dep atap ótti ol.
E.Ivanovanyń aıtýynsha, 10 aıda balalar óliminiń kórsetkishi 8,3 paıyzǵa jetken, ıaǵnı 91 bala kóz jumǵan. Ótken jyldyń sáıkes kezeńimen salystyrǵanda 17,3 paıyzǵa nemese 16 balaǵa tómendedi.
Náresteler arasynda ólim-jitim týa bitken damý kemistikteri úlesinde. Óńirde osyndaı 17 bala qaıtys boldy, onyń beseýinde týa bitti kóptegen damý kemistikteri bolǵan. Tek alty kemistik perınataldy túrde anyqtaldy.
«Úıde jazataıym oqıǵalar men ólim-jitim sany da artyp otyr. Bıyl úıde 10 bala kóz jumdy. Buǵan ata-analardyń bala ómiriniń qaýipsizdigine mán bermeýi sebep bolyp otyr», - dep túıindedi E.Ivanova.
