Aqmola oblysynda jyl basynan 9 bala salmonellezben aýyrdy
Aqmola oblysy Sanıtarııalyq-epıdemıologııalyq baqylaý departamentiniń bas mamany Svetlana Dancheva salmonellez aýrýy jáne ony juqtyrýdyń aldyn alý týraly aıtyp berdi. Onyń sózinshe, 2021 jyldyń ótken kezeńinde Aqmola oblysynda qoǵamdyq tamaqtaný obektilerine qatysy joq salmonellez ınfektsııasynyń 35 jaǵdaıy rastaldy. Basym kópshiligi – 26 jaǵdaı 14 jasqa deıingi balalar arasynda. Eń kóp sany Kókshetaý qalasynda (16) anyqtaldy. Sondaı-aq Stepnogor (8), Býrabaı (7), Astrahan (2), Tselınograd (1) jáne Birjan sal (1) aýdandarynda tirkeldi.
«2021 jyly Aqmola oblysynda salmonellez ınfektsııasynyń 35 jaǵdaıy tirkeldi. Al 2022 jyldyń basynan beri aýrýdyń 9 jaǵdaıy anyqtaldy, onyń 7-ýi Kókshetaýda, 2-ýi Stepnogor qalasynda. Naýqastardyń barlyǵy 14 jasqa deıingi balalar. Aýrýdyń barlyq jaǵdaılary jeke sıpatqa ıe», - deıdi S.Dancheva.
Bas maman atap ótkendeı, salmonellez – bul adam aǵzasyna janýarlardan alynatyn tamaq ónimderimen túsetin Salmonella tektes bakterııalar týdyratyn jiti ınfektsııalyq aýrý. Ol asımptomatıkalyq tasymaldaýdan bastap aýyr septıkalyq formalarǵa deıingi ártúrli klınıkalyq kórinistermen sıpattalady.
«Aýrýdyń belgileri aıqyn kórinýi nemese kórinbeýi múmkin. Alaıda, kóp jaǵdaıda qyzba, jalpy álsizdik, bas aýrýy, júrek aıný, qusý, ishtiń aýyrýy, ishtiń ótýi baıqalady. Syrqattyń aýyr aǵymynda degıdratatsııa, baýyr men kókbaýyrdyń ulǵaıýy baıqalady. Búırek jetkiliksizdiginiń damýy múmkin. Bul jaǵdaıda shuǵyl túrde medıtsınalyq kómekke júginý qajet. Kóbinese aýrý jedel gastrıt, gastroenterıt nemese gastroenterokolıt túrinde bolady», - dep tolyqtyrdy S.Dancheva.
Osy rette, ol qoldy sabynmen ýaqtyly jáne muqııat jýýǵa, ruqsat etilmegen saýda oryndarynda nemese qoldan azyq-túlik satyp almaýǵa, kúmándi sapada, ótkizý merzimi ótip ketken, sterıldi ydysqa býyp-túıilmegen qaınatylmaǵan sút ishpeýge, sondaı-aq shıki jáne daıyn tamaq ónimderin bólek ustaýǵa keńes beredi.