Aqmola oblysynda jýrnalısterge qurmet kórsetildi
KÓKShETAÝ. QazAqparat - Aqmola oblysynda Baılanys jáne aqparat qyzmetkerleri kúni atalyp ótti, dep habarlaıdy QazAqparat tilshisi.
«Dostar» mádenıet saraıynda uıymdastyrylǵan saltanatty sharada BAQ ókilderi arasynda ótken oblystyq «Altyn qalam» baıqaýynyń qorytyndysy shyǵarylyp, úzdikter marapattaldy. Osy rette aımaq basshysynyń atynan quttyqtaý sóz sóılegen Aqmola oblysy ákiminiń orynbasary Aına Mysyrálimova jýrnalıster qaýymynyń elimizdiń, oblysymyzdyń damyp, órkendeýine qosyp kele jatqan úlesteri orasan zor ekenin atap ótti.
«Sizderdiń kásibı joǵary biliktilikterińiz ben óz isterińizge degen adaldyqtaryńyzdyń arqasynda halyqty aqparattandyrý deńgeıi artyp, adamdardyń bir-birimen baılanys aıasy keńeıýde. Elimizdiń qol jetkizgen jetistikterine jýrnalısterdiń qosqan úlesi zor. Sizderdiń talanttaryńyz ben iskerlikterińiz, joǵary moraldyq ustanymdaryńyz Memleket basshysy alǵa qoıǵan bıik mindetterdi júzege asyryp, Otanymyzdyń gúldenip órkendeýine odan ári de kómektese beredi dep senemin», - dedi A. Mysyrálimova.
Saltanatty shara barysynda, «Altyn qalam» baıqaýynyń qorytyndysy shyǵaryldy. Oǵan oblystaǵy respýblıkalyq jáne jergilikti BAQ ókilderi men ardager jýrnalıster birneshe nomınatsııa boıynsha qatysty. Baıqaý kezinde televızııa, baspasóz jáne elektrondy BAQ salasyndaǵy eń úzdik degen shyǵarmashylyq jumystar tańdap alyndy. Baıqaý jeńimpazdary 100 myń teńgeniń sertıfıkaty men oblys ákiminiń Alǵys haty, dıplom jáne baǵaly syılyqtarmen marapattaldy.
