Aqmola oblysynda jumysshy mamandyqtar baıqaýynyń jeńimpazdary anyqtaldy
KÓKShETAÝ. QazAqparat - Kókshetaýda «World Skills Kazakhstan» aımaqtyq baıqaýynyń jeńimpazdary anyqtaldy, dep habarlaıdy QazAqparat tilshisi.
Qazaqstanda kásiptik bilim berý júıesin damytý máselesine jete kóńil bólinip keledi. Búginde álemniń 72 elin qamtyp otyrǵan jumysshy mamandar arasyndaǵy «World Skills» baıqaýyna Qazaqstan 2014 jyldan qatysady. Jumysshy mamandyǵynyń mártebesin arttyrýǵa baǵyttalǵan bul shara elimizde de qyzý qoldaý taýyp otyr. Árbir eki jylda ótkizilip turatyn halyqaralyq jarysqa irikteý bolyp sanalatyn aımaqtyq baıqaýda úmitkerler 32 mamandyq boıynsha baq synady. Olardyń arasynda aqparattyq tehnologııa, as pisirý tehnologııasy, shashtaraz isi, kirpish qalaý, aspazdyq, mektepke deıingi bala tárbıesi, tokarlyq is jáne eńbek naryǵynda úlken suranysqa ıe ózge de mamandyqtar bar.
Aqmolalyq jastar 4 jyl qatarynan «WorldSkills Kazakhstan» qozǵalysyn damytýǵa belsendi qatysýda. Jyl saıyn aqmolalyqtar Ulttyq chempıonattyń qorytyndysy boıynsha úzdik úshtiktiń qatarynan kórinip keledi. Halyqaralyq jarystarda da birneshe márte el namysyn qorǵady.
Jeńimpazdardy marapattaý sharasyna pedagogıka salasynyń ardagerleri, memlekettik organdar men bıznes qaýymdastyq ókilderi jáne oblys aýmaǵyndaǵy kásibı-tehnıkalyq oqý oryndarynan júzden astam bilim alýshy qatysty.
Aıta keteıik, jýyrda «WorldSkills» chempıonaty 190 adamnyń qatysýymen Aqmola oblysynyń 13 aýdanynda ótti. Olardyń arasynda 18-22 jas aralyǵyndaǵy stýdentter men jas mamandar bar. Barlyǵy 60-tan astam jeńimpaz marapattaldy. Onyń ishinde birinshi oryn alǵandarǵa 100 myń teńge, ekinshi men úshinshi oryn alǵandarǵa tıisinshe 75 myń jáne 50 myń teńgeniń sertıfıkattary tapsyryldy.
