Aqmola oblysynda júkti áıelden koronavırýs tabyldy
KÓKShETAÝ. QazAqparat - Aqmola oblysynda bir táýliktiń ishinde 19 adamnan (5 er adam, 13 áıel) koronavırýs ınfektsııasy anyqtaldy. Osylaısha oblys boıynsha koronavırýsqa shaldyqqandar sany 368 adamǵa jetti, dep habarlaıdy QazAqparat tilshisi.
Oblystyq taýarlar jáne kórsetiletin qyzmetterdiń sapasy men qaýipsizdigin baqylaý departamenti osyndaı málimet taratty.
Qaýipti vırýsty juqtyrǵandarǵa keletin bolsaq, Kókshetaý qalasynda – 11 adam, Tselınograd aýdanynda – 5 adam, Býrabaı aýdanynda – 2 adam, Egindikól aýdanynda – 1 adam bar.
«Naýqastar - 1963-1996 jyldar aralyǵyndaǵy 5 er adam men 1958-1998 jyldar aralyǵynda týǵan 13 áıel. Sonymen qatar, bireýi - 2006 jylǵy jasóspirim. Bunyń tórteýi buryn juqtyrǵandarmen baılanysta bolǵan tizim boıynsha ótti. On ekisi medıtsınalyq mekemege ózderi júgingen. Onyń ishinen beseýi eki úı oshaǵy boıynsha tirkeldi. Qalǵany júktiligi boıynsha skrınıngten jáne jumysqa ornalasý úshin medıtsınalyq komıssııadan ótý kezinde anyqtaldy», – deıdi departamentten.
Vedomstvonyń málimetinshe, barlyq naýqastarǵa bekitilgen klınıkalyq hattamaǵa sáıkes medıtsınalyq kómek kórsetiledi.
Juqtyrý oshaqtarynda indetke qarsy is-sharalar júrgiziledi.
