Aqmola oblysynda júkti áıel qutqaryldy
KÓKShETAÝ. QazAqparat- Aqmola oblysynda qar qursaýynda qalǵan aýyldan júkti áıel qutqaryldy, dep habarlaıdy QazAqparat tilshisi oblystyq TJD baspasóz qyzmetine silteme jasap.
Vedomstvonyń málimetinshe, 1 naýryzynda saǵat 16:42 shamasynda Bulandy aýdandyq 8- Órt qutqarý bólimine Karamyshenka aýylynda júkti áıel aýrýhanaǵa jete almaı otyrǵandyǵy týraly telefon arqyly jedel habar tústi.
«Atalǵan meken-jaı boıynsha qutqarýshylar jedel járdem brıgadasymen birlesip, jol talǵamaıtyn TREKOL kóligimen jolǵa shyǵyp, júkti áıeldi 65 shaqyrymdaǵy Makınsk qalasyndaǵy perınataldyq ortalyqqa jetkizdi.
Qutqarýshylardyń shıraq qımylynyń arqasynda Karamyshenka aýylynyń turǵyny A.Saǵynaeva aman-esen qutqaryldy. Qazirgi kezde ol dárigerlerdiń baqylaýynda. Júkti áıel men onyń ishindegi balasyna eshqandaı qaýip tónip turǵan joq», - deıdi vedomstvodan.
Foto: emer.gov.kz
