Aqmola oblysynda júk poıyzyna soqtyǵysqan júrgizýshi mas bolǵan
KÓKShETAÝ. QazAqparat – Aqmola oblysynda temirjol ótkelinde bolǵan oqıǵaǵa kináli kólik ıesi 5 jylǵa júrgizýshi kýáliginen aıyrylýy múmkin, dep habarlaıdy QazAqparat tilshisi oblystyq Polıtsııa departamentiniń baspasóz qyzmetine silteme jasap.
Vedomstvonyń málimetinshe, «Audi 80» kóliginiń júrgizýshisi jeńil deńgeıde alkogoldik masań kúıde bolǵan. Ol temirjol ótkelinde jabyq turǵan shlagbaým men toqtaý týraly dybysty elemeı, júrip kele jatqan júk poıyzynyń aldyna shyǵyp ketken.
«Jeńil kólik ishinde júrgizýshiden bólek, eki jolaýshy boldy. Qazirgi kezde, túrli dene jaraqatymen 67 jastaǵy áıel aýrýhanaǵa jatqyzyldy. Sonymen qatar, kólik ıesine de zalal keldi. 35 jastaǵy júrgizýshige qatysty QR ÁQbK 608-babynyń 3-bóligi (tulǵanyń JKO jasaýy, kólik quralyn basqarý kezinde alkogoldik masań kúıde bolý) boıynsha ákimshilik hattama toltyrylatyn bolady. Atalmysh baptyń sanktsııasy kólik basqarý quqyǵyn 5 jylǵa deıin aıyrýdy qarastyrady», - dep túsindirdi vedomstvodan.
Eske sala keteıik, Aqmola oblysynyń Shortandy aýdanynda temirjol ótkelinde jeńil kólik pen júk poıyzynyń lokomotıvi soqtyǵysqan bolatyn.
