Aqmola oblysynda jolda qalǵan avtobýs jolaýshylary qutqaryldy
KÓKShETAÝ. QazAqparat – Aqmola oblysynda jolda qalǵan toǵyz jolaýshy qutqaryldy, dep habarlaıdy QazAqparat tilshisi oblystyq TJD baspasóz qyzmetine silteme jasap.
Vedomstvonyń málimetishe, qarashanyń 29-da jol-patrýl polıtsııa rotasynyń qyzmetkerleri, polıtsııa kapıtany Áset Aıtymov pen aǵa leıtenant Erzat Esentaev «Ekaterınbor - Almaty» tas jolynyń boıynda, ıaǵnı Tselınograd aýdanynyń Aqmeshit aýylynyń tusynda «Iveko» shaǵyn avtobýsynyń toqtap turǵanyn baıqaǵan. Keıin tártip saqshylary anyqtaǵandaı, kólik isten shyqqan, al salonda toǵyz jolaýshy bolǵan.
«Anyqtalǵandaı, avtokóliktiń ot aldyrý júıesi qatyp qalǵan. Sol sebepti júrgizýshi jol boıynda toqtaýǵa májbúr bolǵan. Jol-patrýl polıtsııa rotasynyń qyzmetkerleri jolaýshylardy ótip bara jatqan kólikterge otyrǵyzyp jiberdi. Al, synǵan kólikti Nur-Sultan qalasyna súırep apardy», - dep túsindirdi vedomstvonyń baspasóz hatshysy Dınara Esenbaeva.
