Aqmola oblysynda jolda qalǵan 224 adam qutqaryldy
KÓKShETAÝ. QazAqparat - Aqmola oblysynda qatty aıaz ben boran kezinde jolda qalǵan 224 adam qutqaryldy, dep habarlaıdy QazAqparat tilshisi aýmaqtyq TJD baspasóz qyzmetine silteme jasap.
Vedomstvonyń deregi boıynsha, 5 aqpanda qutqarý jumystary Býrabaı, Birjan sal, Jaqsy, Atbasar, Shortandy, Ereımentaý jáne Tselınograd aýdandary aýmaǵynda júrgizildi. Oǵan TJD jeke quramynan 35 adam jáne 12 arnaıy tehnıkasy, jergilikti atqarý organdarynan 6 adam jáne 3 tehnıka, jergilikti polıtsııa qyzmetinen 2 adam jáne 2 tehnıka jumyldyrylǵan.
«Býrabaı aýdany aýmaǵynda tańǵy saǵat 09:12 de «Astana-Petropavl» tas jolynyń boıynda, ıaǵnı, Kenesary aýylynan 2 shaqyrym jerde bir jeńil kólik qar qursaýynan shyǵaryldy. Sol kúni saǵat 14:30 «Şýchınsk-Astana» tas jolynyń boıynda «Ekaterınbýrg - Saryaǵash» baǵytynda júrip bara jatqan «Setra» avtobýsy isten shyǵyp, 21 jolaýshy (onyń 14-i tájikstandyq, 4-i reseılik, 3-i qazaqstandyq) qaýipsiz jerge jetkizildi. Al saǵat 15:45 te osy joldyń boıynda «Túmen - Saryaǵash» baǵytyndaǵy jolaýshylar avtobýsyndaǵy 20 adamǵa (2 qazaqstandyq júrgizýshiden basqa, jolaýshylardyń barlyǵy Tájikstan jáne Ózbekstan azamattary) kómek kórsetildi», dep kórsetilgen TJD baspasóz habarlamasynda.
Sonymen qatar, Birjan sal aýdany aýmaǵynda saǵat 10:00 shamasynda «Astana-Petropavl» tas jolynyń 167 shaqyrymynda «Van hool» avtobýsy isten shyqqany týraly habar túsken. Keıin anyqtalǵandaı «Saryaǵash-Ekaterınbýrg» baǵytyndaǵy avtobýsta Ózbekstan Respýblıkasynyń 40 azamaty men 2 qazaqstandyq júrgizýshi boldy. Іsten shyqqan avtobýstaǵy jolaýshylardyń barlyǵy Qoǵam aýylyndaǵy orta mektepke jaıǵastyrylyp, ystyq tamaq jáne jatyn orynmen qamtamasyz etildi.
Al, saǵat 14:30 jáne 23:30 aralyǵynda «Astana-Shidertti» tas jolynyń boıynda barlyǵy 68 adam men 10 tehnıka qutqarylǵan.
Shortandy aýdany aýmaǵynda 14:41 shamasynda «Astana-Petropavl» tas jolynyń 74 shaqyrymynda jolda qalǵan 20 adamǵa kómek kórsetildi.
«Sonymen qatar, qutqarý jumystary Atbasar, Tselınograd, Ereımetaý jáne Jaqsy aýdandary aýmaǵynda da júrgizildi. Jalpy, aýa-raıyna baılanysty 224 adam jáne 12 tehnıka qutqaryldy. Adam shyǵyny men zardap shekkender tirkelgen joq», - delingen habarlamada.
