Aqmola oblysynda jol salasynyń mamandary jetispeıdi
KÓKShETAÝ. QazAqparat - Aqmola oblysynda jol salasynda bilikti mamandar jetispeıdi,dep habarlaıdy QazAqparat «Jol aktıvteri ulttyq sapa ortalyǵy» Aqmola oblystyq fılıalynyń baspasóz qyzmetine silteme jasap.
Vedomstvonyń málimetinshe, búginde aımaqta jol smetasyn jasaıtyn kásibı jobalaýshylar men smetashylar, asfalt-beton zaýyttaryna kásibı operatorlar, synaq zerthanalaryna ınjenerler, tehnık-zerthanashylar sekildi kásibı sheber kadrlar tapshy. Al, jazǵy maýsymda geodezıst, ýchaske bastyǵy, jalpy jol qurylysyna qajetti basqa da mamandar qosymsha qajet bolady.
Mundaı másele tek Aqmola oblysynda ǵana emes, barlyq óńirde bar. Mine, osy maqsatta qazir elimiz boıynsha «Jol aktıvteri ulttyq sapa ortalyǵynyń» elordadaǵy basshylyǵynan bastap, barlyq óńirlerdegi fılıal dırektorlary mektep oqýshylary jáne kolledj stýdentterimen jolshy mamandyǵyna baýlý boıynsha kezdesýler ótkizýde.
Jol salasy mamandarynyń aıtýynsha, jol boıynyń mamandyǵy qazir naryqta úlken suranysqa ıe. Oǵan bir ǵana mysal, bıyl elimizde jol salýǵa jáne jóndeýge 750 mıllıard teńge qarajat bólinip otyr. Bul qarjyny ıgerý úshin 100 myń adam jumysqa tartylady. Olardyń kóbi arnaıy dıplomy bar kásibı mamandar bolýy tıis.
«Oqytýǵa keler bolsaq, elimizde 30-ǵa jýyq joǵary oqý orny men 50-ge tarta kolledj jol salasy boıynsha mamandardy daıyndaıdy. Al, memleket, jol jumysshylaryna osyndaı bilim ordalarynda tegin oqýǵa múmkindik berip otyr. Máselen, 2019-2020 oqý jylyna jol salasyna qatysty mamandyqtarǵa 9570 grant bólindi», - deıdi «Jol aktıvteri ulttyq sapa ortalyǵy» Aqmola oblystyq fılıalynyń dırektory Erbolat Kóshtaev.
Vedomstvodan atap ótkendeı, jolshylardyń jalaqysy 300 myń teńgeden bastalady. Jumys tabý da qıyn emes kórinedi. Muny statıstıka agentiginiń mamandary dáleldegen. Olar, jol salasy mamandary Qazaqstan boıynsha eń tez jumyspen qamtylatyn mamandyq ıeleri ekenin atap ótedi. Máselen, zańger mamandyǵyn bitirgen túlek, orta eseppen bir jarym jylda qyzmetke shaqyrylsa, jolshylar bir jarym aıdyń ishinde jumysqa alynady eken.
