Aqmola oblysynda jol apatynan 41 jastaǵy er adam kóz jumdy
KÓKShETAÝ. QazAqparat - Aqmola oblysynda jol apatynan 41 jastaǵy er adam kóz jumdy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, qazannyń 20-da Stepnogorsk qalasynyń ÓQB-16 dıspetcherine «Makınsk-Aqsý-Torǵaı» avtojolynyń 84 shaqyrymynda jol apaty bolǵandyǵy týraly aqparat túsken.
«Oqıǵa ornyna jetken kezekshi jedel-tergeý tobynyń qyzmetkerleri «Makınsk-Aqsý-Torǵaı» avtojolynyń boıynda, ıaǵnı, Aqsý kenti baǵytyndaǵy Qyryq-qudyq aýyly mańynda «Volkswagen «Golf-2» avtokóliginiń jol apatyna ushyraǵanyn anyqtady. 1978 jylǵy júrgizýshisi joldyń taıǵaq bolýy saldarynan kólikti basqara almaı joldyń shetindegi orǵa aýdarylǵan. Er adam alǵan dene jaraqytynan Stepnogorsk qalalyq kópbeıindi aýrýhanasynda kóz jumdy. Kólikte ol jalǵyz bolǵan», deıdi vedomstvodan.
Sonymen qatar, qazannyń 20-da saǵat 15:00-de Kókshetaý qalasynyń Ýálıhanov kóshesinde «BMW 535» kóliginiń 1996 júrgizýshisi rýlge ıe bola almaı, joldyń qarsy baǵytymen júrip kele jatqan «Aýdı 80» kóligine, al ol óz kezeginde bir baǵytta kele jatqan «Chevrolet Niva» pen joldyń shetinde turǵan «Volkswagen Passat» kólikterine soqtyǵysqan. Osynyń saldarynan 4 kólikke zalal kelgen.
Osyǵan baılanysty tártip saqshylary jolǵa shyqqanda júrgizýshilerge jol qozǵalysy erejesin saqtap, saqtyq sharalaryn esten shyǵarmaýǵa shaqyrady.
