Aqmola oblysynda jol apatyna kináli 5 kólik júrgizýshisi izdestirilýde
KÓKShETAÝ. QazAqparat - Aqmola oblysynda jol-kólik oqıǵasy bolǵan jerden qashyp ketken 5 kólik júrgizýshisi izdestirilýde, dep habarlaıdy «QazAqparat» HAA tilshisi ІІD baspasóz qyzmetine silteme jasap.
Polıtseılerdiń málimeti boıynsha jyl basynan beri Aqmola oblysy aýmaǵynda júrgizýshilerdiń oqıǵa ornynan qashyp ketken 15 jol-kólik oqıǵasy tirkelgen. Onyń ishinde bir adam ajal qushqan. Degenmen, osy kúni kináli on júrgizýshi ustalyp, jaýapkershlikke tartyldy.
Eske sala keteıik, aǵymdaǵy jyldyń 17 qańtarynda túngi saǵat 22:45-derde Arshaly aýdanyndaǵy Jibek joly aýylynyń mańynda, ıaǵnı, «Almaty - Ekaterınbýrg» tas jolynyń 1206 shaqyrymynda jol-kólik oqıǵasynan mert bolǵan er adamnyń denesi tabylǵan bolatyn. Keıin polıtseıler japa shekken er adamnyń 59 jastaǵy Astana turǵyny ekenin anyqtady. Osyǵan baılanysty QR QK 345 babynyń 3 bólimi boıynsha qylmystyq is qozǵaldy. Arnaıy izdestirý toby qurylyp, beınebaqlaý kameralary tekserildi.
Atalǵan jol-kólik oqıǵasyna qatysty qandaı bir aqparatty biletin adamdar bolsa, arnaıy «102» telefon nómiri arqyly ishki ister organdaryna habarlasýyna bolady
