Aqmola oblysynda joǵalǵan boıjetken Nur-Sultannan tabyldy
KÓKShETAÝ. QazAqparat - Aqmola oblysynda iz-túzsiz joǵalǵan 17 jastaǵy jasóspirim qyz Nur-Sultan qalasynda júrgen jerinen tabyldy, dep habarlaıdy QazAqparat tilshisi oblystyq Polıtsııa departamentiniń baspasóz qyzmetine silteme jasap.
Vedomstvonyń málimetinshe, 2020 mamyrdyń 22-de Tselınograd aýdandyq PB kezekshilik bólimine Talapker aýylynyń turǵyny, 38 jastaǵy áıel habarlasyp, 17-i jastaǵy qyzyn izdep tabýǵa kómek suraǵan. Anasynyń aıtýynsha, qyzy mamyrdyń 21-de saǵat 10:30 shamasynda úıinen shyǵyp ketip, qaıtyp oralmaǵan.
«Jasóspirimdi izdestirý úshin krımınaldyq polıtsııa qyzmetkerlerinen arnaıy top quryldy. Tártip saqshylary jasóspirimniń týystary men tanystarynan surastyrdy, jaqyn mańdaǵy úı aýlalaryn tekserdi. Nátıjesinde boıjetken Nur-Sultan qalasynyń Orman zaýyty shaǵyn aýdanynan tabyldy»,-deıdi vedomstvo ókilderi.
Polıtsııanyń habarlaýynsha, jasóspirim din aman, úıine qaıtarylyp, ózimen jáne ata-anasymen profılaktıkalyq áńgime júrgizildi.
