Aqmola oblysynda joǵalǵan bir úıir jylqy kólge batyp ketken

KÓKShETAÝ. QazAqparat - Aqmola oblysynda tórt aıdan astam ýaqyt buryn joǵalǵan bir úıir jylqynyń kólge batyp ketkeni anyqtaldy, dep habarlaıdy QazAqparat tilshisi.

Oblystyq polıtsııa departamenti baspasóz qyzmetiniń málimetinshe, jylqylar 2021 jyldyń jeltoqsanynda joǵalǵan. Bul týraly sol kezde Ereımentaý aýdandyq polıtsııa bólimine jergilikti turǵyn shaǵymdanady. Ol 14 jylqysy erkin jaıylymda júrgen jerinen joǵalyp ketkenin habarlaıdy. Shyǵyn kólemi 7 jarym mıllıon teńgege baǵalanady.

«Ereımentaý aýdandyq polıtsııa bóliminiń qyzmetkerleri barlyq qajetti jedel-izdestirý is-sharalaryn júrgizdi. Janýarlardyń joǵalyp ketý qaýpi bar aımaqtaǵy jyralar, bos jerler, orman alqaptary, sondaı-aq mal tasymaldaýmen aınalysatyn avtokólikter, mal etin ótkizýdiń yqtımal bazarlary tekserildi. Sóıtip, «Qyzyl-sor» kólinen jylqylardyń óleksesi tabyldy. Rezınaly qaıyqty paıdalana otyryp, jedel ýákilder men ýchaskelik ınspektorlar olardy óz kúshterimen shyǵaryp aldy», - dedi vedomstvodan.

Kól jartylaı tuşy, jartylaı tuzdy jáne tómen temperatýrada tolyq muzdanýǵa ushyramaıdy. Anyqtalǵanyndaı, kól betindegi juqa muz qabaty opyrylyp, mal sýǵa batyp ólgen. Qylmys quramynyń bolmaýyna baılanysty is toqtatyldy.

Eske sala ketsek, Atyraý oblysynda 211 jylqynyń aýrýǵa shaldyqqany anyqtalǵan edi.