Aqmola oblysynda joǵalǵan balyqshy 11 táýlikten beri tabylmaı jatyr
KÓKShETAÝ. QazAqparat - Astrahan aýdanynda joǵalǵan balyqshyny izdeý jumystary on bir táýlik boıy úzdiksiz jalǵasýda. Ázirge esh nátıje joq, dep habarlaıdy QazAqparat tilshisi oblystyq TJD baspasóz qyzmetine silteme jasap.
Vedomstvonyń málimetinshe, Barshyn kólindegi izdestirý jumystaryna 15 adamnan turatyn úsh súńgýirler toby, úsh motoqaıyq jáne úsh tehnıka jumyldyryldy. Sonymen birge, aýdan ákimdigi, polıtsııa bóliminiń qyzmetkerleri, eriktiler men janashyr turǵyndar atsalysýda.
«Qutqarýshylar men eriktilerge joǵalǵan balyqshynyń denesin tabýǵa kól aýmaǵynyń úlkendigi men qamystyń kóp bolýy biraz kedergi keltirip otyr», - deıdi vedomstvodan.
Aıta keteıik, 2020 jylǵy qazannyń 23-inde Astrahan aýdanyndaǵy Uzynkól aýyldyq okrýginiń aýmaǵyndaǵy Barshyn kóline tórt adam balyq aýlaý úshin barǵan bolatyn. Sol kúni keshke olardyń úsheýi motorly qaıyqpen kólge júzip ketedi de, bireýi jaǵada qalady. 2020 jylǵy 28 qazanda izdeý toby eki balyqshynyń denesin tabady. Al úshinshi balyqshynyń denesi izdestirilýde.
