Aqmola oblysynda joǵalǵan áıel tanysynyń úıinen tabyldy
KÓKShETAÝ. QazAqparat - Aqmola oblysynda mereke kúnderi joǵalǵan áıel tanysynyń úıinen tabyldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, 2021 jyldyń 3 qańtarynda Aqkól aýdandyq PB kezekshi bólimine jergilikti turǵyn, 54 jastaǵy áıel júginip, ápkesin izdep tabýǵa kómek suraǵan. Onyń sózinshe, ápkesi 1 qańtar kúni keshki saǵat 22:00 shamasynda úıinen shyǵyp, qaıtyp oralmaǵan.
Joǵalǵan áıeldi izdestirý sharalaryna Aqkól aýdandy polıtsııa bóliminiń barlyq jeke quramy tartylyp, jedel-izdestirý toby quryldy. Aqmola oblysy boıynsha barlyq polıtsııa jasaǵyna joǵalǵan áıeldiń belgilerimen baǵdar jiberildi.
«Jedel-izdestirý sharalary barysynda aýdandyq polıtsııa bóliminiń qyzmetkerleri joǵalǵan áıeldi tanysynyń úıinen tapty. Anyqtalǵandaı, boıdaqtar merekelik keshti birge ótkizýdi uıǵarǵan. Polıtseıler áıelmen profılaktıkalyq áńgime ótkizdi» deıdi vedomstvodan.
Áıelge qatysty qandaı da bir qylmys pen quqyq buzýshylyq jasalmaǵan.
Osy rette tártip saqshylary osyndaı jaǵdaılardy aldyn alý maqsatynda óńir turǵyndaryna turǵylyqty jerinen nemese kelgen jerinen uzaq ýaqytqa ketken kezde jaqyndaryn habardar etýge, al alys saparǵa jalǵyz shyqpaýǵa keńes beredi.
