Aqmola oblysynda joǵalǵan 26 jastaǵy sazger eki kúnnen beri tabylmaı jatyr

KÓKShETAÝ. QazAqparat – Aqmola oblysynda iz-túzsiz joǵalyp ketken 26 jastaǵy sazgerdi polıtsııa izdep jatyr, dep habarlaıdy QazAqparat tilshisi.

Oblystyq polıtsııa departamenti baspasóz qyzmetiniń málimetinshe, 14 sáýir kúni saǵat 22:00 shamasynda Jarqaıyń aýdandyq polıtsııa bólimine jergilikti turǵyn júginip, 26 jastaǵy ulyn izdep tabýǵa kómek suraǵan.

Er adamnyń sózinshe, uly sol kúni saǵat 16:00 shamasynda úıinen belgisiz baǵytta shyǵyp ketip, qaıtyp oralmaǵan.

Otbasynda eshqandaı janjal bolmaǵan. Ol osyǵan deıinde birneshe ret úıinen ketip qalyp júrgen eken.

«Joǵalǵan adamdy izdeý úshin Jarqaıyń aýdandyq polıtsııa bóliminiń jeke quramy jáne volonterlerden quralǵan alty izdeý toby quryldy. Іzdeý jumystary Derjavınsk qalasy men jaqyn mańdaǵy eldi mekenderde, Esil ózeni jaǵasy aýmaǵynda júrgizilip jatyr», - dedi vedomstvodan.

Aıta ketsek, joǵalǵan er adamnyń boıy 175-180 santımetr, bet beınesi azıattyq. Dene bitimi aryqsha kelgen.

Ústinen qara kúrtki, aq tústi jıde, sur tústi djınsy men qara sporttyq aıaq kıim kıgen.

Ony kórgen nemese júrgen jerin biletin adam bolsa, 102 telefon nómiri arqyly habarlasýǵa bolady.

Eske sal keteıik, Aqmola oblysynda dárigerler shala týǵan eki náresteni aman alyp qaldy.