Aqmola oblysynda JITS qurbandaryn eske alý aılyǵy ótedi
KÓKShETAÝ. QazAqparat - Jyl saıyn mamyr aıynyń úshinshi jeksenbisi Dúnıejúzilik densaýlyq saqtaý uıymynyń bastamasymen JITS qurbandaryn eske alý kúni bolyp atalyp ótedi. 2019 jyly bul data mamyrdyń 19-na sáıkes kelip otyr. Osyǵan oraı, mamyrdyń 13-i men maýsymnyń 13-i aralyǵynda Aqmola oblysynda JITS qurbandaryn eske alý aılyǵy ótedi, dep habarlaıdy QazAqparat tilshisi.
«JITS qurbandaryn eske alý kúni AITV-men ómir súretin jáne zardap shekken adamdarǵa qoldaý kórsetý, qoǵamǵa osyndaı máseleniń baryn qulaǵdar etý maqsatynda ótkiziledi», - dep atap ótti óńirlik kommýnıkatsııalar qyzmetinde ótken brıfıngte Aqmola oblysynyń JITS-ke qarsy kúres ortalyǵynyń bas dárigeri Qurmanbek Burmaǵanov.
Aıta keteıik, bul kún alǵash ret (World Remembrance Day of AIDS Victims) 1983 jyly AQSh-tyń San-Frantsısko qalasynda atalyp ótilgen edi. Bıylǵy jyly alǵash ret «JITS qurbandaryn eske alý shyraǵdan shamy» - birinshi halyqaralyq memorıaly turǵyzyldy.
Qurmanbek Burmaǵanovtyń aıtýynsha, Aqmola oblysynda mamyrdyń 13-i men maýsymnyń 13-i aralyǵynda ótetin aılyq sheńberinde birqatar sharalardy júzege asyrý josparlanǵan.
«Mamyrdyń 15-de Kókshetaý qalasyndaǵy kolledjder oqýshylarynyń qatysýymen sporttyq estafeta, «Táýelsizdik» alańynda AITV dıagnostıkalaý boıynsha ekspress-ádis, mamyrdyń 17, 22, 23 29 kúnderi jáne maýsymnyń 5-de qurylys-tehnıkalyq kolldej, ortalyq bazar jáne «Altyn ǵasyr» saýda úıiniń aýmaǵynda aqparattyq-bilim berý materıaldary úlestiriledi, sondaı-aq, dáriger mamandar keńes beredi. Al, mamyrdyń 28-de Aqmola oblysynyń JITS-ke qarsy kúres ortalyǵynda ashyq esik kúni ótkizilip, onda dermatovenerolog, gınekolog, pedıator jáne psıholog mamandary qyzmet kórsetedi. Aılyq Kókshetaý qalasynyń ortalyq saıabaǵynda jastardyń kvest oıyny aktsııasymen aıaqtalady», - dep tolyqtyrdy Qurmanbek Burmaǵanov.
