Aqmola oblysynda «Jigit sultany» baıqaýynyń jeńimpazdary anyqtaldy
KÓKShETAÝ. QazAqparat - Aqmola oblysynda «Jigit sultany» baıqaýynyń oblystyq kezeńi ótip, úzdikteri marapattaldy, dep habarlaıdy QazAqparat tilshisi oblystyq mádenıet, arhıvter jáne qujattamalar basqarmasynyń baspasóz qyzmetine silteme jasap.
QR Táýelsizdiginiń 30 jyldyǵyn merekeleý sheńberinde Aqmola oblysy ákimdiginiń qoldaýymen oblystyq halyq shyǵarmashylyq jáne mádenı demalys ortalyǵy, Kókshetaý qalasynyń sport jáne dene shynyqtyrý bólimi tarapynan uıymdastyrylǵan baıqaýǵa oblystyń 11 aýdany men Kókshetaý jáne Stepnogorsk qalasynan 20-29 jas aralyǵyndaǵy 12 jigit qatysty.
«Baıqaýdyń maqsaty – jastardyń boıynda Otanyna degen súıispenshilik sezimin qalyptastyrý, ulttyq tárbıe qundylyqtaryn nasıhattaý, salt-dástúrlerdi saqtaý, ulttyq sport oıyndaryn dáripteý», - deıdi basqarmanyń baspasóz qyzmetindegiler.
Baıqaýǵa oblystyq ádebıet jáne óner mýzeıiniń dırektory, halyqaralyq «Jigit sultany» baıqaýynyń júldegeri – Nurbek Nuralın, Aqmola oblysy ishki saıasat basqarmasynyń «Aqmola oblysynyń «Rýhanı jańǵyrý» óńirlik jobalaý keńsesiniń basshysy – Maral Jaqypova, Kókshetaý qalasy ákimdiginiń janyndaǵy dene shynyqtyrý jáne sport bóliminiń basshysy–Ýálıhan Galıev, oblystyq halyq shyǵarmashylyq jáne mádenı demalys ortalyǵynyń bólim basshysy, respýblıkalyq «Jigit sultany» baıqaýynyń júldegeri – Asylbek Ábenov, Qazaqstan Jazýshylar odaǵy Aqmola oblystyq fılıalynyń tóraǵasy, «Serper», «Daryn» memlekettik jastar syılyqtarynyń ıegeri, «Shabyt» halyqaralyq festıvaliniń Gran-Prı ıegeri – Almas Temirbaı baıqaýǵa tórelik etti.
Baıqaý eki kezeńmen ótkizildi. Birinshi kúni qatysýshylar Krasnoıar selosyndaǵy ıppodromda ótken «Alǵyr jigit» (jamby atý, aýdaryspaq) jáne «Bilekti jigit» (kir tasyn kóterý, armrestlıng) saıystarynda eptilikteri men sheberlikterin kórsetip, kúsh synasty. Al «Kókshetaý» mádenıet saraıynyń sahnasynda ótken ekinshi kezeńde qatysýshylar ózderin tanystyryp, «Bilikti jigit» saıysynda salt-dástúrge qatysty suraqtarǵa jaýap berdi. «Segiz qyrly, bir syrly» saıysynda ónerlerin ortaǵa saldy.
Baıqaý qorytyndysy boıynsha «Jigit sultany» Bas júldesine Manarbek Amankeldi (Krasnoıar aýyly) laıyq dep tanyldy. «Bilekti jigit» atalymynda – Saıat Júzjasarov (Sandyqtaý aýdany), «Ónerli jigit» atalymynda – Aqyldas Semataı (Zerendi aýdany), «Bilikti jigit» atalymynda – Tórejan Beısembaev (Qorǵaljyn aýdany), «Alǵyr jigit» atalymynda – Naýryzbaı Ábdibaı (Egindikól aýdany) jeńimpaz atandy.
Baıqaý jeńimpazdary uıymdastyrý alqasynyń baǵaly syılyqtarymen jáne dıplomdarmen marapattaldy.
