Aqmola oblysynda jerdi tıimdi paıdalaný tásilderi engizilýde
Basqarma basshysynyń aıtýynsha, óńirde pılottyq joba sheńberinde jerdi paıdalanýda ǵaryshtyq monıtorıng engizilýde. Bul fýnktsııany júzege asyrý úshin jerdi qashyqtyqtan zondtaý málimetterimen, sondaı-aq, memlekettik aqparat júıesinen jáne elektrondyq aqparattyq resýrstardan alynǵan málimettermen tizilim kózi tolyqtyrylyp otyr.
«Búgingi kúni aımaqtyń jer qory 14 613,2 myń gektardy quraıdy. Onyń ishinde aýyl sharýashylyǵy maqsatyndaǵy jerlerdiń úlesi 74 paıyz nemese 10 822,1 myń gektar. Eldi mekenderdiń jerleri 1 325,4 myń gektardy, ónerkásip, kólik, baılanys jáne ózge de aýyl sharýashylyǵynan tys jerler 136,1 myń gektardy alyp jatyr», - deıdi B.Ernazarov.
Sonymen qatar, basqarma basshysy jer qoryn taldaý jáne aýktsıon ótkizý boıynsha atqarylǵan jumystardyń qorytyndysy týraly aıtty.
«Oblystyq jer qatynastary basqarmasy kórsetetin jer qatynastary salasyndaǵy memlekettik qyzmetterdiń jalpy sany 12 birlikti quraıdy. Osy memlekettik qyzmettiń jeteýi «Elektrondyq úkimet» veb-portaly arqyly elektrondyq nysanda kórsetiledi. Jyl basynan beri basqarma 35 memlekettik qyzmet kórsetti. 2019 jyly oblys aýmaǵynda aýyl sharýashylyǵy aınalymyna kólemi 96 982 gektar 167 jer ýchaskesi tartyldy. Onyń ishinde egistik – 16 677 gektar, jaıylym – 78 644 gektar, shabyndyq jer – 276 gektar, ózge de alqaptar – 1385 gektar. Aýktsıondar arqyly 430 jer ýchaskesi satyldy. Memlekettik bıýdjetke budan 902 mıllıon teńge qarjy tústi. Búgingi kúni Aqmola oblysynyń aýmaǵynda keń taralǵan paıdaly qazbalardy barlaý nemese óndirý quqyǵy turǵysynda 164 kelisim-shart jumys isteıdi. Jyl basynan beri jer qoınaýyn paıdalanýshylardan aýyl sharýashylyǵy óndirisiniń shyǵyndaryn óteý retinde bıýdjetke shamamen 20,6 mln teńge quıyldy», - deıdi B.Ernazarov.
