Aqmola oblysynda jer qatynastary salasynyń qyzmetkeri alaıaqtyq kúdigine ilindi

KÓKShETAÝ. QazAqparat - Aqmola oblysy boıynsha Sybaılas jemqorlyqqa qarsy qyzmet Jer qatynastary, sáýlet jáne qala qurylysy bóliminiń sektor meńgerýshisine qatysty alaıaqtyq deregi boıynsha tergeýdi aıaqtady, dep habarlaıdy QazAqparat tilshisi.

«Tergeý barysynda anyqtalǵandaı, memlekettik qyzmetshi óziniń qyzmettik jaǵdaıyn paıdalana otyryp, jeke kásipker ókilinen qosymsha jer ýchaskesine jaldaý quqyǵyn berýge kómekteskeni úshin aldaý jolymen aqshalaı qarajat alǵan. Sonymen birge, ol jer ýchaskesin basqa kásipkerge bólý kezinde de osyndaı zańsyz áreketterdi jasaǵan. Qazirgi ýaqytta qylmystyq is sotta qaralyp jatyr», - dedi jergilikti Sybaılas jemqorlyqqa qarsy qyzmettiń baspasóz qyzmetinen.

Vedomstvodan atap ótkendeı, osyndaı quqyq buzýshylyqtardy boldyrmaý maqsatynda Sybaılas jemqorlyqqa qarsy is-qımyl departamenti jergilikti atqarýshy organnyń atyna sybaılas jemqorlyqtyń sebepteri men jaǵdaılaryn joıý boıynsha sharalar qabyldaý týraly (QPK-niń 200-baby tártibimen) usynys engizdi. Atap aıtqanda, jergilikti atqarýshy organdarǵa qosymsha jer ýchaskelerine quqyq alý tártibin reglamentteıtin jer zańnamasyna túzetýler engizýge bastamashylyq etý, osyndaı jerlerdi berý týraly azamattardyń ótinishterin qaraý algorıtmin ázirleý, ótinish berýshiler usynatyn qujattar tizbesin aıqyndaý usynyldy.

Sonymen qatar, óńirdiń Sybaılas jemqorlyqqa qarsy qyzmeti ákimdik qyzmetkerlerimen sybaılas jemqorlyqtyń aldyn alý boıynsha túsindirý kezdesýin ótkizdi. Onda jer qatynastary salasyndaǵy mańyzdy problemalyq máselelerge nazar aýdaryldy, bul týraly qylmystyq-tergeý tájirıbesi kýálandyrady, óıtkeni 2022 jyldyń 1 jartyjyldyǵynda ǵana atalǵan salada alaıaqtyq pen paraqorlyqqa baılanysty 7 qylmystyq is tirkeldi.

«Jer zańnamasyndaǵy olqylyqtar men ashyqtyqtyń bolmaýy josyqsyz sheneýnikterge bızneske jasandy túrde kedergi jasaýǵa múmkindik beredi. Sonyń saldarynan kásipkerlerdiń quqyqtaryna qysym jasalady, bul memlekettik organdar úshin óte qolaısyz. Osy saladaǵy sybaılas jemqorlyq táýekelderin joıý boıynsha júıeli jumys júrgizý, sondaı-aq baǵynyshtylarǵa tıisti baqylaý ornatý qajet», - dedi Sybaılas jemqorlyqqa qarsy kúres vedomstvosynyń basshysy Arman Rahımov.

Aıta ketsek, budan buryn Aqmola oblysynda ósimdikter karantıni jónindegi ınspektor jalǵan sertıfıkattar bergenin jazǵan edik.