Aqmola oblysynda jemqorlyqpen kúresýde belsendilik tanytqandar marapattaldy
KÓKShETAÝ. QazAqparat - «Dostar» mádenıet saraıynda Halyqaralyq sybaılas jemqorlyqpen kúres kúni qarsańynda «Jemqorlyqqa qarsy kózqarasty qalyptastyrýǵa baǵyttalǵan is-sharalardy ótkizý» áleýmettik jobasy aıasynda «Adal jol - Chestnyı pýt» oblystyq forýmy ótti, dep habarlaıdy QazAqparat tilshisi.
Aqmola oblysy ákiminiń orynbasary Oljas Bektenovtiń qatysýymen sharada bıylǵy jyldyń 1 sáýirinen 9 qarashasy aralyǵynda oblysymyzdyń barlyq óńirlerinde ótken «Adal jol - Chestnyı pýt» forýmynyń qorytyndylary shyǵarylyp, belsendiligimen kózge túskender arnaıy dıplomdarmen, alǵys hattarmen marapattaldy.
Jemqorlyqqa qarsy beınerolıkter túsirilimi baıqaýy boıynsha jeńimpaz atanǵandardyń qatarynda Kókshetaý qalasyndaǵy №3 kóp tilde oqytatyn mektep-gımnazııasy, №1 Balkashın orta mektebi bar. Óńirler arasynan Jarqaıyń aýdany birinshi dárejeli dıplommen marapattalsa, Esil jáne Qorǵaljyn aýdandary ekinshi, úshinshi satydan kórindi. QR Memlekettik qyzmet jáne jemqorlyqqa qarsy is-qımyl agenttigi Aqmola oblysy boıynsha departamentiniń basshysy Bergen Bespalınov jyl basynan bergi qoǵamda jemqorlyqqa qarsy kózqarasty qalyptastyrý baǵytyndaǵy atqarylǵan jumystar jaıynda baıandady. Búgingi kúnge deıin 33 myńdaı adamdy qamtyǵan 437 shara ótkizilip, mektepterde jemqorlyqqa tózbeýshilikti nasıhattaıtyn 195 balalar klýby jumys istep kelgen.
Qoǵamda jemqorlyqqa qarsy tózbeýshilikti qalyptastyrýǵa oraı forým aıasynda úndeý jarııalanyp, ony «Aqmola-Tirshilik» JShS dırektory, QR eńbek sińirgen qaıratkeri Jabal Erǵalıev oqyp berdi. Jyl ishinde jemqorlyqqa qarsy nasıhat jumystaryna belsene qatysqan bir top BAQ ókilderi alǵys hattarmen marapattaldy.
