Aqmola oblysynda jemqorlyqpen kúres forýmy ótti
KÓKShETAÝ. QazAqparat - Aqmola oblysynda jemqorlyqqa qarsy «Adal jol - Chestnyı pýt» atty forým ótti, dep habarlaıdy QazAqparat tilshisi.
Halyqaralyq jemqorlyqpen kúres kúnine oraılastyrylǵan sharaǵa aımaq basshysy Málik Myrzalın, QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenov, oblystyń ár aýdany men qalasynan kelgen delegattar, qoǵamdyq jáne úkimettik emes uıymdardyń, saıası partııalardyń jetekshileri, JOO jáne orta-arnaýly oqý oryndarynyń oqytýshylary men stýdentteri, memlekettik qyzmetshiler, bıznes jáne BAQ ókilderi qatysty.
«Ult kóshbasshysy Nursultan Nazarbaev óziniń qazaqstandyqtarǵa arnaǵan «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda jemqorlyqpen kúresýdiń negizgi basymdyqtaryn atap ótti. Qoǵam ókilderiniń barlyǵy bir adamdaı jemqorlyqpen kúresýge atsalyssa, onda onyń tıimdiligi de arta túsedi», - dedi aımaq basshysy forýmda sóılegen sózinde.
Forýmda oblystyq «Adal jol - Chestnyı pýt» jemqorlyqqa qarsy marafonynyń qorytyndysy shyǵaryldy. Marafon sheńberinde oblystyń barlyq óńirinde 30 myńnan astam adam qamtylǵan jemqorlyqqa qarsy mádenıet qalyptastyrý baǵytynda 400-ge jýyq shara ótkizildi.
Aqmolalyqtardyń jemqorlyqqa qarsy mádenıetiniń deńgeıin qalyptastyrý jáne jemqorlyqqa qarsy is-qımyl, keń aýqymydy aqparattyq-túsindirý jáne mádenı-buqaralyq sharalar uıymdastyrýda ólsheýsiz úles qosqany úshin Jaqsy aýdany 1-shi, Sandyqtaý aýdany 2-shi jáne Birjan sal aýdany 3-shi orynǵa laıyq dep tanyldy. Sonymen qatar, marafonǵa belsendi qatysqan Astarhan jáne Jarqaıyń aýdandarynyń qatysýshylaryna da dıplom tapsyryldy.
Osy oraıda, Oljas Bektenov aqmolalyqtar uıymdastyrǵan marafon ortalyq apparattyń qoldaýymen respýblıkamyzdyń barlyq óńirinde qolǵa alynǵanyn atap ótti.
«Jemqorlyqqa qarsy «Adal jol - Chestnyı pýt» marafonyn ótkizý ıdeıasy aqmolalyqtarǵa tıesili. QR Memlekettik qyzmet isteri jáne sybaılas jemqorlyqqa qarsy is-qımyl agenttigi osy tájirıbeni qabyldap, elimizdiń barlyq óńirine taratty. Búgingi kúni Aqmola oblysy boıynsha departament elimiz boıynsha úzdikter qatarynda. Sońǵy ótken alqa jıynda agenttik tóraǵasy óńirdiń atqarýshy organdarymen birlesken jumystyń uıymdastyrylýyna oń baǵasyn berdi», - dedi QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary.
Sonymen qatar, aqmolalyqtardyń boıynda jemqorlyqqa qarsy mádenıet qalyptastyrýda eleýli úles qosqan bilim, mádenıet, bıznes qaýymdastyǵy jáne BAQ ókilderiniń bir toby marapattaldy.
