Aqmola oblysynda jemqorlyqqa qarsy saıasat tujyrymdamasynyń jobasy talqylandy
Jıynǵa oblys ákiminiń orynbasary Eldos Ramazanov, Sybaılas jemqorlyqqa qarsy is-qımyl aýmaqtyq departamentiniń basshysy Arman Rahımov, oblystyq Kásipkerler palatasynyń jáne onyń óńirlik fılıaldarynyń basshylary men ókilderi, sondaı-aq oblystyń bıznes-qoǵamdastyǵynyń ókilderi qatysty.
Kezdesýde Eldos Ramazanov sybaılas jemqorlyqqa qarsy saıasat qyzmettiń barlyq salasyn qamtıtynyn, bul turǵyda memlekettik organdar men búkil qoǵamnyń sybaılas jemqorlyqqa qarsy is-qımyldaǵy kúsh-jigerin shoǵyrlandyrý qajet ekenin atap ótti. Sonymen birge, ol Memleket basshysynyń bılik pen bıznestiń halyq ıgiligi úshin ózara is-qımyl joldaryn belgileý jónindegi tapsyrmasyna toqtaldy.
Óńirdiń Sybaılas jemqorlyqqa qarsy vedomstvosynyń basshysy Arman Rahımov óz sózinde qatysýshylarǵa aldaǵy 5 jylǵa arnalǵan sybaılas jemqorlyqqa qarsy is-qımyl jónindegi strategııalyq qujat jobasynyń mańyzdy erejelerin usyna otyryp, kásipkerlik qoǵamdastyqtyń tujyrymdamany ázirleýge belsendi qatysýynyń mańyzdylyǵyn atap ótti.
«Memleket basshysy korporatıvtik sybaılas jemqorlyqqa qarsy is-qımylǵa erekshe nazar aýdara otyryp, bıznes-qoǵamdastyqpen sybaılas jemqorlyqqa qarsy saıasat tujyrymdamasynyń jobasyn muqııat talqylaýdy tapsyrdy. Qujatty ázirleý barysynda jurtshylyqtyń, bıznes ókilderiniń, sarapshylar men azamattardyń pikirleri, sondaı-aq sheteldik tájirıbe eskerilgenin atap ótkim keledi. Tujyrymdamada naqty reformalardy, onyń ishinde bıznes qyzmetine qatysty ózgeristerdi qamtıtyn sybaılas jemqorlyqqa qarsy qyzmetti jetildirýdiń odan ári baǵdarlary usynylǵan. Sonymen qatar, búgin biz osy máseleni odan ári syndarly usynystar ázirleý úshin óńirimizdiń kásipkerlerimen egjeı - tegjeıli talqylaǵymyz keledi», - dep atap ótti Arman Rahımov.
Sonymen birge, departament basshysy tujyrymdamanyń mańyzdy basymdyqtarynyń biri - sybaılas jemqorlyqqa qarsy standarttardy engizýdi, sondaı-aq sybaılas jemqorlyqqa qarsy komplaens-qyzmetter ınstıtýtyn iske asyrýdy kózdeıtin adal bıznesti damytýǵa toqtaldy. Budan basqa, adal jumys isteıtin kompanııalar memlekettik satyp alý, salyq salý, sýbsıdııalar alý jáne memlekettik qoldaýdyń basqa da túrleri kezinde artyqshylyqtarǵa ıe bolýy tıis. Osy sharalardyń barlyǵy jeke sektordy bıznesti adal júrgizýge yntalandyrýǵa baǵyttalǵan.
Kezdesý qorytyndysy boıynsha kásipkerler strategııalyq qujat jobasyn belsendi talqylap, pikir almasyp, sybaılas jemqorlyqqa qarsy is-qımyl aıasynda tıimdi ózara is-qımyl boıynsha birqatar usynystardy engizdi.
Aıta ketsek, 7 bólimnen turatyn Sybaılas jemqorlyqqa qarsy saıasat tujyrymdamasynyń jobasynda parasatty qoǵamdy qalyptastyrý, sybaılas jemqorlyqtyń sebepterin azaıtý, sybaılas jemqorlyq úshin jaýapkershiliktiń bultartpastyǵyn qamtamasyz etý, azamattyq qoǵamdy sybaılas jemqorlyqtyń aldyn alýǵa tartý, sybaılas jemqorlyqqa qarsy saıasattyń monıtorıngi, sondaı-aq Sybaılas jemqorlyqqa qarsy qyzmettiń jumysyn jetildirý máseleleri kórsetilgen.