Aqmola oblysynda jemqorlyqqa qarsy mýral paıda boldy

KÓKShETAÝ. QazAqparat - Kókshetaý qalasynda sybaılas jemqorlyqqa qarsy kúres taqyrybynda óńirdegi alǵashqy mýral paıda boldy, dep habarlaıdy QazAqparat Sybaılas jemqorlyqqa qarsy is-qımyl agenttigine silteme jasap.

Mýral «Adaldyq alańy» jobasy aıasynda Sybaılas jemqorlyqqa qarsy is-qımyl agenttigi Aqmola oblysy boıynsha departamentiniń bastamasymen salyndy. Abylaı han dańǵylyndaǵy kópqabatty turǵyn úıdiń qasbetindegi art-nysan parasattylyq qaǵıdatyn nasıhattaýǵa jáne sybaılas jemqorlyqtan bas tartýǵa úndeıdi.

«Qyzmet kórsetsin dep dara bólek,

Para berse «joq» deıtin sana kerek,

Ótinemin, adal bolshy, aınalaıyn,

Bizge baılyq emes, bala kerek!» - osyndaı sózdermen úıdiń qabyrǵasynda beınelengen aǵa býyn ókili kishige júginedi.

Oblystyq departament basshysy Murat Tóleýbaevtyń aıtýynsha, Kókshetaý qalasy ákimdiginiń qoldaýymen qurylǵan bul kompozıtsııa eldegi qazirgi jaǵdaıda asa ózekti.

«Azamattar epıdemıologııalyq jaǵdaıǵa baılanysty túrli qıyndyqtarǵa tap bolǵan kezde, keıbir josyqsyz adamdar qaltasyn basqalardyń esebinen tolyqtyrýǵa tyrysady. Osy turǵyda oblystyń Sybaılas jemqorlyqqa qarsy qyzmeti sybaılas jemqorlyq quqyq buzýshylyqtardyń aldyn alý jáne jolyn kesý boıynsha tıisti sharalar qabyldaýda. Sondyqtan biz qoǵamdy árdaıym parasatty ómir saltyn ustanýǵa, sondaı-aq óskeleń urpaqqa moraldyq qundylyqtardy sińirýge shaqyrǵymyz keledi», - dedi Murat Tóleýbaev.