Aqmola oblysynda jemqorlyqqa qarsy forým ótti
KÓKShETAÝ. QazAqparat - Aqmola oblysynda Halyqaralyq jemqorlyqpen kúres kúnine oraılastyrylǵan «Ózgerister tolqynynda» taqyrybymen forým ótti, dep habarlaıdy QazAqparat tilshisi.
Kókshetaýdaǵy «Bolashaq saraiy» -da ótken sharaǵa aımaq basshysy Ermek Marjyqpaev, Aqmola oblysy boıynsha Sybaılas jemqorlyqqa qarsy is-qımyl departamentiniń basshysy Arman Rahımov, oblystyń ár aýdany men qalasynan kelgen delegattar, qoǵamdyq jáne úkimettik emes uıymdardyń, saıası partııalardyń jetekshileri, JOO jáne orta-arnaýly oqý oryndarynyń oqytýshylary men stýdentteri, memlekettik qyzmetshiler, bıznes jáne BAQ ókilderi qatysty.
Forýmǵa qatysýshylar úshin sybaılas jemqorlyqqa qarsy vırtýaldy jáne «Parasatty otbasy» fotosýretter kórmeleri usynyldy. Onda qatysýshylarǵa sybaılas jemqorlyqqa qarsy is-qımyl salasyndaǵy negizgi baǵyttar boıynsha jyl ishindegi jetistikter jáne sybaılas jemqorlyqqa qarsy saıasattyń perspektıvalary tanystyryldy.
Sharada sóz sóılegen aımaq basshysy Ermek Marjyqpaev sybaılas jemqorlyqqa qarsy is-qımyl aıasynda memlekettik organdar men jurtshylyqtyń tıimdi ózara is-qımylynyń mańyzdylyǵyn atap ótti.
«2004 jyldan bastap BUU bastamasymen jyl saıyn 9 jeltoqsanda Halyqaralyq sybaılas jemqorlyqqa qarsy kúres kúni atap ótiledi. Sybaılas jemqorlyq jahandyq qaýip tóndiredi, sondyqtan Memleket basshysy bul máselege ulttyq saıasattyń basty baǵyttarynyń biri retinde kóp kóńil bóledi. Bizdiń qoǵamshyldarymyz ben azamattarymyzdyń belsendi qoldaýymen búgingi kúni biz óńirde jaqsy nátıjelerge qol jetkizdik. Aldaǵy ýaqytta da sybaılas jemqorlyqqa qarsy is-qımyl aıasynda aýqymdy jumystar jalǵasatynyna senimdimin», - dedi Ermek Marjyqpaev.
Óńir basshysy qoǵam qaıratkerlerine jáne BAQ ókilderine Sybaılas jemqorlyqqa qarsy mádenıetti qalyptastyrýǵa qosqan úlesi úshin alǵys hattar tabys etti.
«Sybaılas jemqorlyqtyń aldyn alýdyń keshendi sharalary elimizdiń halyqaralyq reıtıngterdegi ornyn jaqsartýǵa múmkindik berdi. Máselen, 2020 jyly sybaılas jemqorlyqty qabyldaý ındeksinde Qazaqstan Ortalyq Azııa elderi arasynda kóshbasshy bolyp qalyp, 19 pozıtsııaǵa kóterildi. Memlekettiń mańyzdy jetistikteriniń biri, Sybaılas jemqorlyqqa qarsy memleketter toby (SJQMT) halyqaralyq uıymyna múshelik boldy. Bul memlekettik organdar men azamattardyń birlesken kúsh - jigeriniń arqasynda múmkin boldy jáne búgingi forým Memleket pen azamattyq qoǵam arasyndaǵy ózara is-qımyldyń biregeı alańyn usynady», - dep atap ótti Aqmola oblysy boıynsha Sybaılas jemqorlyqqa qarsy is-qımyl departamentiniń basshysy Arman Rahımov.
Budan bólek, halyq arasynda parasattylyq mádenıetin ilgeriletý sheńberinde júrgizilip jatqan jumystar týraly Stepnogor qalasynyń ákimi, oblystyq bilim, ishki saıasat, sondaı-aq mádenıet, muraǵattar jáne qujattamalar basqarmalary basshylarynyń baıandamalary tyńdaldy.
Forým barysynda «Parasatty otbasy» baıqaýynyń, BAQ arasynda sybaılas jemqorlyqqa qarsy taqyryptaǵy baıqaýdyń, sondaı-aq memlekettik qyzmetshiler men zań salasynyń ókilderi marapattaldy.
