Aqmola oblysynda jemqorlyqqa qarsy alǵashqy stýdenttik kvest bastaldy
Sharaǵa QR Sybaılas jemqorlyqqa qarsy is-qımyl agenttigi janyndaǵy respýblıkalyq arnaıy monıtorıngtik toptyń tóraǵasy Aıgúl Soloveva, «Sanaly urpaq» respýblıkalyq jobalyq keńsesiniń basshysy Qaıyrjan Toqyshev, óńirdiń Sybaılas jemqorlyqqa qarsy qyzmetiniń basshysy Murat Tóleýbaev, oblys ákiminiń orynbasary Qanat Ydyrysov t.b qatysty.
Bul oıyn-kvest sybaılas jemqorlyqtyń aldyn alýdyń jańa ádisi retinde jastardyń boıynda sybaılas jemqorlyqqa qarsy mádenıetti qalyptastyrýǵa, parasattylyq pen akademııalyq adaldyq qaǵıdattaryna tárbıeleýge baǵyttalǵan. Bir aı ishinde stýdentter aldyn ala daıyndalǵan prank-arandatýlardy boljap, QR-kodtardyń kómegimen krımınalıstik, zııatkerlik jáne shyǵarmashylyq mindetterdi sheship, beınetaspalar jasaıdy.
«Kóp halyqtyń biri ǵana emes, óz eliniń belsendi azamaty bolý mańyzdy. Sizderge, jastarǵa, damý men bastamalardyń draıveri retinde úlken úmit artylady. Sizder sybaılas jemqorlyqtan azat qoǵam quryp, bolashaqta memleketimizdiń órkendeýin qamtamasyz etetindikterińizge úmit artamyz», - dedi Aıgúl Soloveva óz sózinde.
Osy rette, onlaın rejımde baılanysqa shyqqan Qaıyrjan Toqyshev stýdent jastardy sybaılas jemqorlyqqa qarsy mádenıetti qalyptastyrýda belsendi bolýǵa shaqyrdy.
Fakýltet komandalaryn stýdenttik aktıvter jınalystarynda daýys berý ádisimen buryn tańdalǵan «adaldyq kapıtandary» basqardy. Olar ýnıversıtettiniń Ádep jónindegi ýákiliniń kómekshi, ári óz fakýltetterindegi senimdi ókili bolady.
«Jas urpaq arasynda rýhanı-adamgershilik qundylyqtardy tárbıeleýge jáne sybaılas jemqorlyqqa qarsy kózqarasty qalyptastyrýǵa erekshe kóńil bólinýde. Ol úshin biz «Adaldyq alańy», «Sanaly urpaq», «Adal urpaq» jobalaryn júzege asyrýdamyz, sondaı-aq, parasattylyq saǵattaryn ótkizip kelemiz. Ádildik, parasattylyq pen senim elimizdiń árbir jas azamaty úshin basty qundylyq bolatynyna senimdimin», - dedi Murat Tóleýbaev.
Aıta keteıik, aqpan aıynyń sońynda kvest oıynynyń qorytyndysy retinde «adaldyq kapıtandary» týrnıri ótedi, onda jeńimpazdar arnaıy ótpeli syılyq - adaldyq kýbogymen marapattalatyn bolady.
