Aqmola oblysynda jemqorlyqqa qarsy aqparattyq-aǵartýshylyq shtab quryldy
Bul týraly QazAqparat Aqmola oblysy boıynsha Sybaılas jemqorlyqqa qarsy is-qımyl departamentiniń baspasóz qyzmetine silteme jasap habarlaıdy.
Sharaǵa qatysqan Aqmola oblysy ákiminiń orynbasary Marat Iǵalı 2003 jyldyń 9 jeltoqsanynda qol qoıylǵan jáne sybaılas jemqorlyq kórinisterimen kúreste halyqaralyq yntymaqtastyqtyń tetikterin anyqtaıtyn BUU Konventsııasynyń mańyzdy halyqaralyq-quqyqtyq qujaty týraly aıtty. Qazaqstan Respýblıkasy 2008 jylǵy mamyrdan bastap osy Konventsııanyń tolyqqandy múshesi.
Osy rette, QR Sybaılas jemqorlyqqa qarsy is-qımyl agenttiginiń aýmaqtyq departamentiniń basshysy aımaqtyq aqparattyq-aǵartýshylyq shtabyn qurý týraly usynys jasady.
«Aldyn alý sharalaryn odan ári jetildirý, úılestirý jáne uıymdastyrý maqsatynda búgingi tańda osyndaı qyzmetti júzege asyrýǵa baǵyttalǵan jańa qoǵamdyq tetikti qurý qajettiligi paıda boldy. Belsendi azamattyq ustanymdy júrgizgenderge shyn júrekten alǵys aıtamyn. Aqparattyq-aǵartýshylyq shtab bizdiń birlesken qyzmetimizge jańa serpin berip, barlyq azamattardyń sybaılas jemqorlyqqa qarsy mádenıetti qalyptastyrýdaǵy ózara is - qımylyn kúsheıtedi», - dep atap ótti departamenttiń basshysy Murat Tóleýbaev.
Odan ári aımaqtyq Aqparattyq-aǵartýshylyq shtab jetekshisi, qoǵam qaıratkeri Ǵosman Tóleǵul sóz sóılep, barlyq azamattardy sybaılas jemqorlyq kórinisterin qabyldamaýǵa, parasattylyqqa, adaldyqqa, ádildik pen patrıotızmge tárbıeleýge shaqyrdy.
Aqmola oblysy ákimdiginiń Ádep jónindegi ýákili Aınagúl Janádilova memlekettik qyzmet jáne sybaılas jemqorlyqqa qarsy is-qımyl týraly zańnamanyń etıkalyq normalary men talaptaryn saqtaý boıynsha baıandama jasady.
Shara qonaǵy - belgili jazýshy Jan Aqjanov boldy, ol sybaılas jemqorlyqqa qarsy dúnıetanym men adamgershilik qundylyqtardy qalyptastyrýdaǵy óz pikirleri men bilimderimen bólisti.
Semınar barysynda sybaılas jemqorlyqqa qarsy qyzmettiń jumysy men júzege asyrylatyn is-sharalary týraly beınematerıaldar kórsetildi. Sondaı-aq, bir top qoǵam ókilderi sybaılas jemqorlyqqa qarsy mádenıetti qalyptastyrýǵa qosqan úlesteri úshin QR Sybaılas jemqorlyqqa qarsy is-qımyl agenttiginiń tóraǵasy Alık Shpekbaevtyń Alǵys hatymen marapattaldy.
