Aqmola oblysynda jemqor sheneýnik sottaldy

KÓKShETAÝ. QazAqparat - Memlekettik qyzmetshiler arasynda sybaılas jemqorlyqtyń aldyn alý sheńberinde Aqmola oblysy boıynsha Sybaılas jemqorlyqqa qarsy is-qımyl departamentiniń bastamasymen Kókshetaý qalalyq sotynyń sot otyrysynyń onlaın-kórsetilimi ótkizildi. Sotta óńirdiń Jumyldyrý daıyndyǵy jáne aýmaqtyq qorǵanys basqarmasynyń laýazymdy tulǵasyna qatysty sybaılas jemqorlyq qylmystyq is boıynsha úkim shyǵaryldy, dep habarlaıdy QazAqparat tilshisi.

Sybaılas jemqorlyq áreketteriniń saldary týraly memlekettik qyzmetshilerdiń sanasyna áser etý jáne qaıta sybaılas jemqorlyq quqyq buzýshylyqtaryn jasaýǵa jol bermeý maqsatynda sottalýshynyń áriptesteri onlaın rejıminde sot protsesin baqylady.

Otyrys sońynda óńirdiń Sybaılas jemqorlyqqa qarsy vedomstvosynyń aldyn alý basqarmasynyń basshysy Janaıdar Ramazanov memlekettik organnyń eńbek ujymyna sybaılas jemqorlyqqa qarsy is-qımyl zańnamasyndaǵy mańyzdy ózgeristerdi jáne sybaılas jemqorlyq týraly habarlaǵany úshin kótermeleý júıesin túsindirip, qatysýshylardy sybaılas jemqorlyqqa qarsy shekteýler men etıkalyq normalardy saqtaýǵa shaqyrdy.

«Óz kezeginde oblystyq Jumyldyrý daıyndyǵy jáne aýmaqtyq qorǵanys basqarmasynyń basshylyǵy qyzmetkerler arasynda tıisti aldyn alý jumystaryn júrgizýge jáne mekemedegi sybaılas jemqorlyqtyń sebepteri men jaǵdaılaryn joıý boıynsha qajetti sharalar qabyldaýǵa ýáde berdi», - dep atap ótti Aqmola oblysy boıynsha Sybaılas jemqorlyqqa qarsy is-qımyl departamentiniń baspasóz qyzmetindegiler.

Kezdesýge qatysýshylar pikir almasty, usynystar aıtyp, memlekettik qyzmetshilerdiń sybaılas jemqorlyqqa qarsy mádenıetin qalyptastyrý aıasynda osyndaı is-sharalardy ótkizýdiń mańyzdylyǵyn atap ótti.

Aıta keteıik, úkim zańdy kúshine engen joq.