Aqmola oblysynda jazasyn ótep júrgenderdiń arasynda hattar baıqaýy ótti
KÓKShETAÝ. QazAqparat - Halyqaralyq áıelder kúni merekesi qarsańynda Aqmola oblysynda jazasyn ótep júrgenderdiń arasynda analary men jubaılaryna, qyzdaryna arnap jazǵan hattar baıqaýy ótti, dep habarlaıdy «QazAqparat»HAA tilshisi.
Aqmola oblysy boıynsha qylmystyq atqarý júıesi departamentiniń bólim bastyǵy, ádilet podpolkovnıgi Gúlnar Osmanovanyń málimeti boıynsha, sharaǵa 22 adamnyń 23 haty qatystyrylyp, ádil qazylardyń baǵasyn aldy. Ómirde jańsaq basyp, opyq jegen jazalaryn ótep júrgenderdiń arasynda ótkenine ókinip, aladǵy ómirlerinde sol qatelerin jasamaýǵa bekinip júrgender az emes. Atalmysh shara sondaı jandardyń júrek syrlaryn aq qaǵaz arqyly eń jaqyn adamdaryna jetkizýge talpynǵan áreketteriniń jemisi dese bolady.
«Meniń anam týǵan kúnimnen bastap qamqor boldy, jaqsy isterime qýanyp, jamandyǵymdy kórse kúıindi. Anamnyń kózderindeı meıirimdi kózdi eshqashan kórgen emespin. Meniń jetistigimdi kórgende qýanyshynda shek bolmaıtyn...». Bul urlyq istegeni úshin segiz jylǵa sottalǵan jazasyn óteýshiniń hatynan úzindi. Jary Nastıaǵa degen saǵynysh sezimi men jubaılyq ómiriniń eń baqytty sátterin eske alǵan sezimge toly hattyń avtory oılanbaı istegen oqys isine ókinip, qalǵan ómirin otbasymen ótkizýdi armandaıtynyn aıtady. Al, esirtki zattaryn taratqany úshin on jylǵa bas bostandyǵynan aıyrylǵan 44 jastaǵy azamattyń anasy týraly júrekjardy syry hatty oqyǵan ádil qazylardyń kóńilderin tolqytty. Kishkentaı kezinde ózin tastap ketken anasyna degen saǵynyshyn hat arqyly aq qaǵazǵa tókken qyryqtyń qyrqasyndaǵy azamattyń haty oqyǵandardyń janaryna eriksiz jas úıiriltti.
Hattar baıqaýynyń jeńimpazyn anyqtaý ádil qazylarǵa ońaı soqpady. Baıqaý jeńimpazdary qylmystyq atqarý júıesi departamenti basshysynyń gramotasymen marapattaldy.
